Caldera
Una caldera es un cratèr volcanic eissit d'un afondrament lòng de linhas concentricas. Lei calderas an un diamètre d'au mens 2 km. Son fons es generalament relativament plan e l'ensemble es enviroutat per de bauç marcats d'au mens plusors centenaus de mètres d'autor.
La formacion d'una caldera es iniciada per lo trescolatge rapid d'una importanta quantitat de magma dins la cambra magmatica dau volcan durant una erupcion. D'efiech, aquò pòu entraïnar la formacion d'una cavitat vueja en dessota de l'edifici volcanic e pòu menar a son afondrament. Aqueu procès es una etapa normala dins la vida de la màger part dei volcans poligenics mai pòu de còps s'observar sus de volcans monogenics. L'afondrament a sovent de consequéncias catastroficas per lei regions vesinas dau volcan. En particular, lei volcans situats sus una illa ò lòng d'un litorau pòdon engendrar de tsunamis fòrça importants[1].
Lei calderas pòdon se formar tant sus lei volcanis effusius que sus lei volcans explosius. De còps, après sa formacion, pòdon èsser emplidas per un lac de cratèr. La màger part dei calderas an un diamètre de quauquei quilomètres. Pasmens, aquelei dei supervolcans pòdon agantar de dimensions fòrça importantas, de l'òrdre de plusors desenaus de quilomètres. A l'ora d'ara, la pus granda qu'es coneguda per lei volcanològs es aquela dau Mont Toba. Situada au nòrd-èst de Sumatra, a una forma ovala de 100 × 30 km e es la consequéncia d'una importanta erupcion que se debanèt i a 75 000 ans.