Maridatge
 |
Aqueste article es pas acabat. Es en fasa d'escritura o de reestructuracion importanta.
|
Lo maridatge o matrimòni es un acte solemne d'union contractuala o rituala entre doas personas de mesa en plaça d'un quadre de proteccion mutuala e de proteccion de lor descendéncia. Pòu èsser motivat per d'interès personaus, familhaus, economics o sentimentaus. Lo maridatge es una institucion sociala anciana que son existéncia es atestada tre l'aparicion de l'escritura. Pasmens, sei modalitats son fòrça variablas segon lei regions. En particular, lei drechs e devers dei maridats presentan de diferéncias importantas segon lei luòcs e leis epòcas. Lei condicions d'accès au maridatge son tanben pas identicas dins totei leis Estats. Per exemple, certanei país autorizan la poliandria e d'autreis enebisson lo maridatge entre individús dau meteis sèxe. Lo ròtle deis autoritats estatalas o religiosas es egalament un aspècte important.
Lo maridatge es vist coma definitiu, e mai s'existisson de mejans per lo rompre dins la màger part deis Estats. Es donc sovent l'ocasion d'una fèsta importanta que pòu recampar lei maridats, sei familhas, seis amics, de captaus e divèrseis aliats dei linhatges implicats dins la ceremònia. Lo maridatge a tanben un ròtle important per l'estat civiu deis individús car pòu definir lo nom d'ostau portat per una persona.