Yamamoto Isoroku

Yamamoto Isoroku (4 d'abriu de 1884, Nagaoka - 18 d'abriu de 1943, Illas Salomon) es un amirau japonés de la Segonda Guèrra Mondiala e una personalitat importanta dei combats dins l'Ocean Pacific.

Yamamoto Isoroku

Acceptat dins la marina imperiala japonesa en 1904, participèt ai combats navaus de la Guèrra Russojaponesa en 1905. Durant la Premiera Guèrra Mondiala, foguèt mandat ais Estats Units per facilitar la cooperacion entre flòtas aliadas. Puei, durant l'entre doas guèrras, foguèt delegat ai conferéncias navalas de Londres de 1929 e de 1934. En 1936, foguèt nomat vice-ministre de la Marina e recebèt lo comandament de la flòta nipona en 1939. Melhorèt l'entraïnament e privilegièt l'utilizacion dau pòrta-avions.

Pauc favorable a una ataca còntra leis Estats Units, foguèt pasmens cargat de menar l'ofensiva japonesa còntra Pearl Harbor. Puei, enregistrèt de succès importants en Asia dau Sud-Èst. Dins aquò, foguèt durament batut a Midway (6-9 de junh de 1942). Après aqueu combat, leis operacions se concentrèron dins l'illa de Guadalcanal onte lei Japonés èran a assaiar de blocar l'avançada dei tropas dau generau Douglas MacArthur. Dins aquò, leis Estatsunidencs conquistèron la totalitat de l'illa en fevrier de 1943. Après aquela revirada, Yamamoto reorganizèt lei defensas niponas dins leis Illas Salomon. Pasmens, l'itinerari de son avion foguèt descubèrt per leis Estats Units. L'aeronau foguèt ansin interceptat lo 18 d'abriu de 1943 e abatut.

Liames intèrnes

• Segonda Guèrra Mondiala.

Bibliografia

• (en) Hiroyuki Agawa, The Reluctant Admiral. Yamamoto And The Imperial Navy, Kodansha International Ltd, 1979.