Douglas MacArthur
Douglas MacArthur (26 de genier de 1880, Little Rock – 5 d'abriu de 1964, Washington) es un generau estatsunidenc famós per son ròtle durant la Segonda Guèrra Mondiala e durant la Guèrra de Corèa.
Nascut dins una familha de militars d'Arkansas, Douglas MacArthur intrèt dins l'acadèmia de West Point en 1899. A sa sortida quatre ans pus tard, venguèt sosluòctenent dins l'engèni. Realizèt plusors missions en Asia e en Mexic avans la Premiera Guèrra Mondiala. En 1917, foguèt nomat coronèu e venguèt cap d'estat-major de la 42a division estatsunidenca, unitat que participèt ai combats en França a partir de febrier de 1918. MacArthur se destrièt durant aqueleis operacions e recebèt plusors medalhas. Venguèt generau en junh de 1918 e, après la guèrra, foguèt encargat de la direccion de l'escòla de West Point. Puei, foguèt nomat ai Filipinas avans d'acabar sa carriera coma cap d'estat-major de l'armada de 1930 a 1935.
En julhet de 1941, en causa de l'aumentacion dei tensions entre leis Estats Units e Japon, Roosevelt tornèt integrar MacArthur au servici actiu e li fisèt lo comandament dei fòrças estatsunidencas dei Filipinas. Resistiguèt a l'invasion japonesa de l'archipèu fins a març de 1942. Roosevelt lo nomèt alora comandant dei fòrças aliadas dau sud-oèst de l'Ocean Pacific. Durant aqueu periòde, MacArthur s'opausèt sovent a l'estrategia de l'amirau Chester Nimitz que comandava lei flòtas aliadas en l'Ocean Pacific. Coma leis Estats Units avián lei ressorsas per seguir lei doas estrategias, MacArthur poguèt aplicar seis idèas. Aguèt ansin un ròtle important dins la destruccion dei fòrças japonesas dins leis illas dau sud e ai Filipinas. En 1945, foguèt nomat cap de totei lei fòrças aliadas dau teatre pacific e dirigiguèt leis armadas d'ocupacion de Japon.
En 1950, recebèt la direccion dei tropas dei Nacions Unidas, principalament compausadas de tropas estatsunidencas, en Corèa. I organizèt lo desbarcament d'Incheon que menèt a la destruccion de la màger part de l'armada nòrd-coreana. Dins aquò, MacArthur foguèt susprés per la còntra-ofensiva chinesa. Per restablir sei posicions, demandèt d'atacas nuclearas còntra lo territòri chinés. Aquò inquietèt lo president Truman que preferiguèt remplaçar MacArthur per lo generau Ridgway en abriu de 1951. Fins a sa mòrt, MacArthur demorèt una personalitat populara ais Estats Units e conselhèt plusors presidents sus leis afaires militars.
Liames intèrnes
modificarBibliografia
modificar- (en) Richard B. Frank, MacArthur, Palgrave Macmillan, coll. « Great Generals Series », 2007.