Batalha de Midway
La batalha de Midway foguèt una batalha navala majora de la Segonda Guèrra Mondiala que se debanèt dau 4 au 7 de junh de 1942. Opausèt lei flòtas estatsunidenca e japonesa dins la region de l'atòl de Midway. Lei Japonés ataquèron l'illa per assaiar d'eliminar lei fòrças aeronavalas estatsunidencas e, eventualament, ocupar una basa aeriana importanta dau dispositiu de defensa deis Estats Units dins l'Ocean Pacific. Pasmens, l'operacion s'acabèt per una desfacha japonesa grèva ambé la pèrda d'unei pòrta-avions.
.jpg)
_is_hit_by_a_torpedo_on_4_June_1942.jpg)
_02.jpg)
Lo plan de l'amirau Isoroku Yamamoto prevesiá d'atraire lei pòrta-avions estatsunidencs vèrs lei fòrças navalas japonesas gràcias a un assaut aerian e terrèstre còntra l'atòl de Midway. Per s'assegurar de la victòria, gropèt de fòrças importantas d'aperaquí 8 pòrta-avions e 12 cuirassats. En parallèl, ordonèt una ataca còntra leis Illas Aleutianas. Pasmens, leis Estatsunidencs avián capitat de descriptar lo còdi dei transmissions japonesas. Aquò li permetèt de descubrir lei detalhs dau plan de Yamamoto e de s'organizar en consequéncia. De mai, dins lo corrent de la batalha, la reconóissença japonesa mau capitèt de localizar d'un biais precís la posicion dei naviris estatsunidencs. Enfin, la division de la flòta japonesa entre diferenteis esquadras afebliguèt la marina imperiala que poguèt pas engatjar totei sei mejans dins lo combat.
De son caire, lei pilòts aguèron tanben de dificultats per trobar la flòta japonesa. Pasmens, capitèron de menar un bombardament au moment de la preparacion d'una ataca japonesa. Sei bombas entraïnèron alora l'explosion dei municions e dau carburant situats sus lo pònt dei pòrta-avions japonés. En solament sièis minutas, tres pòrta-avions japonés foguèron mortalament tocats e destruchs per d'incendis. Puei, una còntra-ataca japonesa permetèt d'endomatjar un pòrta-avion estatsunidenc que foguèt abandonat per la màger part de son equipatge e finalament aprefondat per un sosmarin lo 7. Pasmens, aquò empachèt pas una onda novèlas d'atacas estatsunidencas de destrurre un quatren pòrta-avion japonés. Après sa revirada, la flòta japonesa se retirèt e leis Estatsunidencs refusèron de menar una perseguida perilhosa dins l'Ocean Pacific còntra d'esquadras qu'èran encara numericament superioras. Dins aquò, lo 7, un crosaire japonés endomatjat foguèt localizat e destruch per l'aviacion.
Lei pèrdas japonesas foguèron donc de 4 pòrta-avions, 1 crosaire, 248 avions e mai de 3 500 tuats. De son caire, leis Estatsunidencs perdiguèron 1 pòrta-avions, 1 destroièrs, 150 avions e 307 tuats. La flòta estatsunidenca prenguèt d'ara endavant l'iniciativa dei combats dins l'Ocean Pacific car la construccion navala de Japon capitèt jamai de remplaçar sei pèrdas. De mai, la demenicion de la menaça navala japonesa permetèt ais Estats Units de mobilizar mai de naviris dins l'Ocean Atlantic per luchar còntra lei sosmarins alemands.