Castèuvièlh
|
Vilatge d'Occitània | 
|
Castèuvièlh (Châteauvieux en francés) es una comuna provençala situada dins lo departament de Var e la region de Provença-Aups-Còsta d'Azur.
|
Castèuvièlh
Châteauvieux | ||
|---|---|---|
_Vallon_de_Font_Freye.JPG) | ||
| Comba de Fòntfreia | ||
| ||
| ||
| Geografia fisica | ||
| ||
| Coordenadas | 43° 46′ 41″ N, 6° 34′ 44″ E | |
| Superfícia | 14,97 km² | |
| Altituds · Maximala · Mejana · Minimala |
1 271 m 1 040 m 843 m | |
| Geografia politica | ||
| País |  Provença | |
| Estat |  França | |
| Region 93 |
Provença-Aups-Còsta d'Azur | |
| Departament 83 |
Var  | |
| Arrondiment 831 |
Draguinhan | |
| Canton 8308 |
Flaiòsc (Comps d'Artubi avans 2015) | |
| Intercom 000000010 |
CC de Lacs e Gòrgas de Verdon | |
| Cònsol | Julien Girard (2020 - 2026) | |
| Geografia umana | ||
| Populacion Populacion totala (2018) |
81 ab.  82 ab. | |
| Densitat | 5,41 ab./km² | |
| Autras informacions | ||
| Còde postal | 83840 | |
| Còde INSEE | 83040 | |
Situat au nòrd dau departament a proximitat dau limit deis Aups de Provença Auta, Castèuvièlh es un vilatge relativament isolat que si situa a mai de 1 000 m d'altitud. Lo clima li es donc de tipe mediterranèu amb d'influéncias montanhardas marcadas. Coma lei vilatges vesins, son territòri es integrat dins lo Pargue Naturau Regionau de Verdon e dins la Resèrva Naturala Geologica d'Auta Provença. L'abitat es devesit a l'entorn d'un vilatge aut centrat a l'entorn de la glèisa e d'un vilatge bas organizat a l'entorn dau castèu. Aquela particularitat es liada a l'istòria trebolada de l'endrech.
D'efiech, poblat tre la Preïstòria, lo territòri de Castèuvièlh foguèt chausit per l'installacion au sègle XI o au sègle XII d'una abadiá de fremas que fasiá partida de l'òrdre de Cîteaux. L'endrech conoissèt son apogèu durant lo sègle XIV e foguèt destruch per lei tropas dau senhor brigand Ramon de Turena. En 1342, lo vilatge de Castèuvièlh es mencionat dins un document que sinhala son restacament a la vigariá de Castelana per lo còmte de Provença. Fèu de l'Ostau de Castelana, lo vilatge passèt entre lei mans de divèrsei familhas coma l'Ostau de Demandòus. En 1575, lo castèu e lo vilatge aut foguèron destruchs per lei tropas de la Liga Catolica menada per lo baron de Vins. Aquò entraïnèt la reconstruccion dau castèu dins lo vilatge bas.
En 1677, Castèuvièlh foguèt vendut a l'Ostau d'Arbaud de Castèuvièlh, un linhatge noble locau que conoissèt una certana favor dins leis armadas reialas durant lo sègle XVIII. Durant la Revolucion, aquela familha deguèt abandonar lo vilatge e son castèu foguèt sasit per leis autoritats. Pasmens, la veusa dau darrier senhor de Castèuvièlh posquèt recuperar sa proprietat en 1815. A sa mòrt, va donèt a sa cosina e lo castèu venguèt la proprietat de captaus de la region durant lo sègle XIX.
Lo vilatge declinèt lentament durant lo sègle en causa de l'exòdi rurau. La populacion passèt ansin de 166 abitants en 1806 a un minimom de 26 en 1968 e 1975. Dempuei aquela data, es en aumentacion leugiera amb 79 estatjants recensats en 2019. Dins aquò, lo vilatge es totjorn menaçat per la desertificacion. Gràcias a son istòria senhorala, l'endrech dispausa d'un patrimòni arquitecturau constituit per lo castèu dei senhors de Castèuvièlh entre lei sègles XVII e XVIII e per divèrseis edificis religiós.
Personalitats liadas a la comuna
modificar- Antòni d'Arbaud de Castèuvièlh, chivalier de l'Òrdre de Sant Joan de Jerusalèm.
- Loís d'Arbaud de Castèuvièlh, luòctenent de vaissèu e chivalier de l'Òrdre de Sant Loís.
