Sèrgi III
Sèrgi III (mòrt lo 14 d'abriu de 911) foguèt lo 119en papa de la Glèisa Catolica dau 29 de genier de 904 au 14 d'abriu de 911. Succediguèt a Leon V (julhet-decembre de 903) e foguèt remplaçat per Anastasi III (911-913).
Originari de Roma, s'opausèt a la politica dau papa Formòsi (891-896) e sostenguèt lo Sant Empèri Roman Germanic dins lei conflictes que tocavan Itàlia. En particular, participèt au concili cadaveric cargat de condamnar Formòsi après sa mòrt. En 898, assaièt de venir e organizèt una eleccion en sa favor còntra lo futur Joan IX (898-900) qu'èra lo candidat oficiau de l'emperaire. Pasmens, poguèt finalament pas empachar l'elecccion de son rivau. Excomunitat e exilat, foguèt pas autorizat a rintrar dins la vila santa avans lo periòde de trèbols deis annadas 903-904. Gràcias au sostèn dau còmte de Tusculum [[Teofilacte Ièr|[[Teofilacte Ièr]], foguèt elegit papa lo 29 de genier de 904.
Son pontificat foguèt marcat per l'influéncia de son protector, [[Teofilacte Ièr|[[Teofilacte Ièr]], que donèt probablament mai d'un òrdre au papa. Ansin, tre lo començament de son rèine, foguèt benlèu obligat d'executar lo papa Leon V e l'antipapa Cristòfor[1]. Puei, prenguèt divèrsei mesuras per condamnar lei partisans e lei decisions de Formòsi ò, au contrari, annular lei condamnacions presas còntra seis adversaris. Per exemple, annulèt lei condamnacions dau concili cadaveric. Regardant la guèrra civila per lo tròne imperiau entre Berenguer Ièr d'Itàlia e Loís lo Bòrni, assaièt inicialament de mantenir la division de l'Empèri que li donava una certana autonòmia. Pasmens, sostenguèt finalament lo partit de Loís lo Bòrni car Berenguer Ièr d'Itàlia aviá laissat sei vassaus atacar lo territòri pontificau. Enfin, Sèrgi III menèt de trabalhs importants dins lo Palais de Latran.