Joan IX
Joan IX (840, Tivoli - 26 de març de 900, Roma) foguèt lo 116en papa de la Glèisa Catolica Romana de genier de 888 au 26 de març de 900. Succediguèt a Teodòr II (decembre de 898) e foguèt remplaçat per Beneset IV (900-903).
Son eleccion se debanèt dins lo contèxte de la crisi italiana entraïnada per la lucha entre l'Ostau de Spoleto e Arnulf de Caríntia per lo títol imperiau. Lo papa Formòsi (891-896) aviá sostengut e coronat Arnulf en 896. Pasmens, aqueu succès foguèt brèu e Roma èra estada ocupada per de faccions fidèlas ai Spoleto. A la fin de 896, lo cadabre de Formòsi èra estat exumat per èsser jutjat e condamnat (concili cadaveric) per son successor Estève VI. Aquò aviá entraïnat d'esmogudas dins la vila e Estève VI i foguèt tuat per leis abitants de Roma en majoritat fidèu a Formòsi. En decembre de 898, Teodòr II ordonèt la reabilitacion de Formòsi mai foguèt assassinat après quauquei jorns de pontificat.
Lo pontificat de Joan IX, benlèu elegit gràcias au sostèn dau duc de Spoleto, foguèt principalament consacrat a la resolucion dei consequéncias de la crisi italiana dins la vila pontificala. Premier, confirmèt la reabilitacion de Formòsi e reüniguèt un concili per condamnar lo concili cadaveric. Puei, prenguèt una tiera de mesuras per restablir la disciplina au sen de la Glèisa (defensa per leis evesques de quitar son diocèsi sensa autorizacion... etc.). Enfin, regardant l'òrdre urban, adoptèt divèrsei mesuras per enebir e arrestar lei violéncias entre lei diferentei faccions romanas.
Regardant leis afaires non romans, favorizèt la conversion pacifica dei pagans e acceptèt la creacion d'una ierarquia eslava en Moràvia en despiech de l'oposicion dau clergat germanic.