Paul Lombard
Paul Lombard (15 de decembre de 1927, La Ciutat - 7 de junh de 2020, Lo Martegue) es un òme politic provençau. Sòci dau Partit Comunista Francés, foguèt cònsol major dau Martegue de 1969 a 2009, conselhier generau de 1970 a 1988 e deputat dei Bocas de Ròse de 1988 a 1993.
Biografia modificar
Paul Lombard nasquèt a La Ciutat en 1927 dins una familha d'origina martegala. Sei parents èran de sòcis dau Partit Comunista Francés e, per de rasons professionalas, la familha s'entornèt rapidament au Martegue. Durant la Segonda Guèrra Mondiala, son paire, Paul-Baptistin Lombard (1903-1944), s'engatjèt dins la Resisténcia. Arrestat, foguèt fusilhat lo 13 de junh de 1944.
Paul Lombard comencèt sa carriera politica après la guèrra. En 1953, gràcias a la demission de sa maire, intrèt au conseu comuna dau Martegue. En 1959, venguèt adjonch ai finanças après l'eleccion de Francis Turcan. Aqueu periòde veguèt lo començament de la modernizacion de la vila dins lo quadre de la creacion de la zòna industriala de Fòs. Après lo decès de Francis Turcan, Paul Lombard venguèt cònsol major dau Martegue e foguèt aisament reelegit fins a 2008. Foguèt tanben deputat de la circonscripcion dau Martegue de 1988 a 1993. Sota sa direccion, Lo Martegue foguèt l'objècte d'importants trabalhs de modernizacion destinats a acuelhir una importanta populacion novèla (27 945 abitants en 1968, 46 671 en 2008). Aquò foguèt marcat per la construccion d'escòlas, d'un sistèma modèrne de produccion d'aiga potabla, d'un espitau e d'infrastructuras de transpòrt adaptadas. Puei, a partir deis ans 1980, la politica de Paul Lombard se concentrèt sus lo domeni culturau amb lei recèrcas arqueologicas dins lo quartier de l'Illa, la construccion d'una bibliotèca comunala modèrna e d'un teatre. Fondèt tanben una premsa locala (Radio Maritima).
Paul Lombard laissèt la direccion de la vila a Gaby Charroux en 2009. Moriguèt lo 7 de junh de 2020 e foguèt enterrat dins lo cementèri dau Martegue.