Francis Turcan
Francis Turcan (1912 - 8 de decembre de 1968) es un òme politic que foguèt premier cònsol dau Martegue de 1946 a 1947 e de 1959 a 1968. Inicièt lo periòde de modernizacion de la vila que durèt de la fin deis ans 1950 au començament deis ans 1990. Foguèt remplaçat a sa mòrt per Paul Lombard que contunièt sa politica e demorèt premier cònsol dau Martegue fins a 2009.
Emplegat administratiu, Francis Turcan venguèt premier cònsol dau Martegue en 1946 dins lo contèxte de la Liberacion. Sòci dau Partit Comunista Francés, succediguèt a Jacques Toulmond qu'aviá ocupat lo pòste en 1945-1946. D'efiech, en causa de sei pèrdas durant la guèrra, lei comunistas avián obtengut la direccion de la vila après l'expulsion deis Alemands en aost de 1944. Pasmens, Turcan foguèt batut ais eleccions de 1947 e 1953 per Paul Pascal (SFIO) que poguèt aprofichar lo sostèn de la drecha.
Dins aquò, la perseguida de l'industrializacion de la region renforcèt pauc a pauc la posicion dei comunistas. De mai, l'aumentacion rapida de la populacion martegala entraïnava de problemas grèus en causa de la manca d'infrastructuras modèrnas. En 1959, la lista PCF foguèt donc elegida e Turcan venguèt tornarmai premier cònsol dau Martegue. Deguèt faciar una situacion malaisada, totjorn marcada per una aumentacion rapida de la demografia amb 15 000 abitants en 1954 e 28 000 en 1968. Inicièt donc la modernizacion de la vila gràcias a de trabalhs importants dins totei lei domenis : pònts sus lei canaus de la vila, construccion de lotjaments sociaus, organizacion de la regia deis aigas, melhorament dau sistèma d'evacuacion deis aigas, construccion dau licèu Paul Langevin... etc.
Uei, l'estadi e una avenguda importanta dau Martegue pòrtan son nom.