Papacito
Ugo Gil Jimenez, dich Papacito, es un militant de l'extrèma drecha francesa nascut en Occitània lo 14 de genièr de 1986 a Tolosa, actiu mai que mai coma videasta sus Internet.
Biografia modificar
Joventut e formacion modificar
Ugo passa son enfança en Occitània dins la banlèga oèst de Tolosa a Plasença deu Toish. Sos parents son de refugiats politics espanhòls, mainatges de militants opausats a Francisco Franco pendent la Guèrra Civiu Espanhòla. Se desmarca de sa familha vist qu'afirma al contrari son admiracion pel dictator espanhòl.
A viscut dins una familha d'extrèma esquèrra de Gasconha tolosana. A quitament militat qualques annadas al Partit Comunista Francés a Arcueil, en region parisenca (França) abans de « prene consciéncia del mond que l'entorneja e de metre lo nas defòra » al ponch de cambiar radicalament d'opinions politicas per s'orientar cap al nacionalisme. Afirma aver estudiat la sociologia e declara que las facultats en França son « lo crusòl de l'esquèrra ».
Influéncias e frequentacions modificar
Papacito se ditz influenciat per de personatges masculins sulfuroses coma los dictators Saddam Husayn, Francisco Franco, Rodrigo Duterte e Vladímir Pótin.
Es pròche del Raptor dissident, autre videasta eissit de l'extrèma drecha sus Internet ambe lo qual fonda en 2018 lo hashtag « MonteUneEquipe », lèu rebatejat « Vengence Patriote » (Venjança patriòta), ambe la tòca de recampar los nacionalistas de França e de luchar contra « l'aflaquiment de l'Occident ».
Aqueste grop d'extrèma drecha que compta quatre cents sòcis es suspectat de projèctes d'accions violentas e s'entraina al combat en prevision d'un esfondrament de la societat. Pasmens, los dos influenciaires abandonan lo projècte en 2019, que serà alavetz représ per Lucas Sztandarowski.
Es tanben pròche de Zineb El Rhazoui, de Thaïs d'Escufon (l'èx pòrtaparaula de l'organizacion dissolguda Generacion identitària), e de l'èx-sòci del Front Nacional Julien Rochedy.
Activitat de creator de contengut modificar
En 2012, après los atemptats de Tolosa pel jihadista Mohammed Merah, obrís lo blòg « FDP de la mode » jol pseudonim Papacito, qu'a una influéncia sul Raptor dissident. S'agís d'una critica virulenta opausada al politicament corrècte, a la societat francesa vist que Papacito la considèra victima de laxisme judiciari, de feminizacion, de marxisme cultural e de benpensança. Dins aqueste blòg, fa l'apologia de la virilitat, i fa lo retrach de personatges supausats representar l'òme vertadièr, viril, coma Saddam Husayn, Jan de Lassala, Francisco Franco, Rodrigo Duterte e Vladímir Pótin ; i fa tanben l'apologia d'unes regims dictatorials.
En 2014, s'assòcia al dessenhaire Marsault per crear una benda-dessenhada entitolada « FDP de la mode », publicada en 2018. La meteissa annada, apareis dins una emission del Raptor dissident qu'el co-anima puèi. L'emission s'arrèsta en mai de 2018, remplaçada per Crash Test ont Papacito apareis de faiçon esporadica.
Parallèlament, publica en çò de las edicions Ring lo libre satiric « Carnets de guerre ».
Aviá una cadena YouTube que comptava mai de 194 000 abonats, mas es estada clausurada en junh de 2023 après mantuns avertiments e la publicacion d'una video (afar Montjòi) avent entrainat una campanha de secutament.
En març de 2023, lança lo podcast Burger Ring, que fa partida dels podcasts mai populars sus la plataforma de streaming Spotify en França.
Posicionament e ideologia politica modificar
Papacito afirma admirar l'ancian dictator espanhòl Francisco Franco e sosten l'ipotèsi d'un còp d'estat en França. Es qualificat de monarquista, masculiniste, viriliste, omofòb e racista. Se definís quitament el meteis de fascista dins una de sas videos controvertidas.
Lo jornal francés L'Obs parteja lo constat de Romain Fargier qu'o descriu coma « un reialista dins l'arma, prigondament anti-republican e fascinat per l'Edat Mejana ». De còps, s'autòproclama ambe umor « rei del Visigòts » coma Occitan de soca espanhòla, vist que l'ancian Reialme visigòt de Tolosa coïncidís mai o mens ambe l'Occitània e l'Espanha d'ara.[1]
Sas provocacions serián al servici d'una ideologia nacionalista, xenofòba e viriliste. Sembla tanben obsedit per l'immigracion e l'Islam. Fa partida, segon France info e Paul Conge, dels nostalgics de « la virilitat perduda de l'òme pòst-modèrn » e de « los qu'asiran […] lor mòde de vida d'omosexuals e que crenhon una immigracion de massa ».
The Conversacion escrich que se presenta coma « un passaire d'idèas que cerca de popularizar d'ideologias d'extrèma drecha », mas que sa pensada es pas totjorn coerenta. Aquel vejaire es partejat per un rapòrt de la cort d'apèl de París consultat per Mediapart, que qualifica Papacito d'aprendís comedian vengut influenciaire politic que promòu una ideologia racista, omofòba e masculiniste pontuada de grossieretats. Los magistrats deploran que son discors es fòrça eficaç en çò de las generacions joves e s'inquièton de son influéncia sus de militants d'extrèma drecha que serián susceptibles de cometre d'actes terroristas.
Sosten la candidatura d'Éric Zemmour puèi de Marine Le Pen a l'eleccion presidenciala de 2022 en França. Pendent una emission sus CNews en 2021, Éric Zemmour aviá declarat èsser l'amic de Papacito, abans de lo qualificar de « dròlle simpatic e intelligent ». En seguida de la desfacha d'Éric Zemmour al primièr torn, regèta l'utilitat de las eleccions e crida sa comunautat a quitar las ciutats « nises a criminalitat » per anar viure en autarquia a la campanha en lor aconselhant de s'equipar per se defendre ; segon lo jornal francés Le Monde, aquela crida es representativa d'una radicalizacion dels influenciaires d'extrèma drecha.
Conspiracionisme modificar
Segon Conspiracy Watch, fa partida dels qu'instrumentalizan, de faiçon complotista, la nocion d'Estat prigond ; aderís a la teoria complotista del « grand remplaçament » e a la d'un esfondrament.
Segon Papacito, lo concèpte de republica, pel lo qual desvolopa dins de nombrosas videos son aversion, seriá un complòt francmaçon.
Acusacions de menaças e incitacions a la violéncia modificar
Contra los d'esquèrra modificar
En 2021, Papacito publica la video « l'esquerrista es parabalas ? », dins la quala tira sus una mariòta representant un elector d'esquèrra e explica coma se procurar d'armas per tirar sus los esquerristas per verificar se « l'esquerrisme es parabalas », abans d'o escotelar a mantuns còps.
Reconeis lo caractèr provocant de sa video mas precisa qu'es d'umor. Nèga aver apelat al murtre, mas al contrari ditz aver volgut « ajudar » e convidar los electors d'esquèrra a « se protegir del terrorisme » per aquela demostracion.
Lo siti francés Mediapart contèsta aquesta afirmacion e declara puslèu u'utiliza l'ironia e mots codats per amagar son agressivitat caps als militants d'extrèma esquèrra. Aquela video auriá ajudat a acréisser sa visibilitat.
Los comunistas franceses Fabien Roussel (Partit Comunista Francés) e Jean-Luc Mélenchon (La França Insomesa) sasisson lo procuraire de la Republica puèi pòrtan planh per incitacion a l'òdi en denonciant un apèl al murtre.
Una enquèsta es obèrta contra Papacito per « provocacion al murtre ». Es classada sens seguida a la fin de l'annada 2021.
Un planh novèl ambe constitucion de partida civila es depausat en setembre de 2022 al nom de Jean-Luc Mélenchon e de La França Insomesa.
Contra los jornalistas modificar
En genièr de 2021, sul sit d'extrèma drecha francés Boulevard Voltaire, declara que « tipicament i a de monde, en çò de Télérama, en çò de Libération, en çò de Mediapart, que deurián començar de niflar qu'aquela radicalitat de drecha acabarà per los atrapar. Se collabòra pas impunidament, s'o sap ».
Afirma d'un autre costat que France Inter « insulta los franceses e insulta Jèsus ambe l'argent dels franceses » e ditz tanben « aquí vòli far un daquòs, es crompar un caval e li anar metre de còps d'espasa dins l'occipital », çò que, per Mediapart, evòca las decapitacions pendent las crosadas.
En 2021 puèi en 2022, Papacito menaça publicament lo jornalista especialista de l'extrèma drecha Pierre Plottu, co-autor d'articles sus el, d'anar a son domicili, çò qu'avia una èrsa de cibersecutament e de menaças per d'unes sòcis de sa comunautat cap al jornalista. En junh de 2022, lo dich jornalista Pierre Plottu depausa un planh.
A la debuta de 2024, un jornalista de La Despacha del Miègjorn avent cobèrt lo conflicte de vesinatge de Montjòi es la cibla d'una campanha de cibersecutament menada per Papacito.
L'afar Montjòi modificar
En setembre de 2022, Papacito bota en linha una primièra video d'acusacion de corrupcion del cònsol màger del vilatge de Montjòi, en Occitània (dins lo Tarn e Garona). Aquela video, realizada ambe George Matharan, ancian collaborator de Valeurs actuelles e de Livre noir, es difusada sus sa cadena YouTube, mas es lèu retirada pels moderators del sit.
Lo conflicte a lo qual pren part Papacito a debutat en 2017. Concernís lo drech de passatge d'un camin comunal. Opausa d'un costat Pierre-Guillaume Mercadal, un jove elevaire de pòrcs lanoses, e de l'autre, un proprietari anglés e lo cònsol màger de la comuna. Per fin que i aja pas de passatges dins la proprietat de l'Anglés, lo camin comunal es estat desviat en 1999. En 2017, l'elevaire vòl far un bastiment mas considèra que lo camin novèl es impracticable e perilhós. Exigís alavetz de poder passar sos camions sus l'ancian qu'es pas jamai estat desclassat. S'es enseguit de nombroses procèsses entre las doas partidas, l'elevaire e lo cònsol màger s'acusant sustot de menaças recipròcas. Dins sa video, Papacito pren fach e causa per l'elevaire, figura del pichon paisan occitan, cap al ric proprietari anglés qu'auriá, segon sas acusacions, corromput lo cònsol màger.
En mai de 2023, Papacito difusa una video novèla, ont lo cònsol màger de Montjòi es qualificat de « faïna ». S'i vei un òme desguisat en faïna pres en caça per d'òmes armats, seguit d'una mesa en scèna del viòl de l'animal daissat inanimat. Entre aquelas scènas, la video mòstra tanbent Papacito e son amic dins la maison comuna prenent a partit l'elegit, refugiat dins son burèu. La publicacion d'aquela video avia una campanha de cibersecutament contra lo cònsol màger (menaças de mòrt, apèls a la violéncia e apèls al viòl), aital coma d'intimidacions sus plaça (la bandièra de la comuna es raubada per de militants d'extrèma drecha, e la comuna patís de degradacions).[2]
A la debuta de junh de 2023, lo cònsol màger es plaçat jos proteccion policièra e lo procuraire de la Republica sasís conjonchament l'Ofici central de lucha contra los crimis contra l'umanitat e los crimis d'òdi. La participacion de dos jornalistas d'extrèma drecha de Valeurs actuelles (Baudouin Wisselmann, cap del servici video e Wilfried Mortièr, video-jornalista) a n'aquesta video ambe Papacito, genèra, segon lo jornal Libération, una crisi dins la redaccion de Valeurs actuelles. Aquela video e lo secutament qu'avia entrainan la barradura de la cadena YouTube de Papacito qu'aviá ja recebut mantuns avertiments.
Papacito es mes en examèn lo 12 de decembre de 2023 dins l'encastre d'una enquèsta menada per l'Ofici central de lucha contra los crimis contra l'umanitat e l'òdi en linha, jos la direccion del pòl nacional de lucha contra l'òdi en linha del postam de París, per « provocacion non seguida d'efièch a un atac volontari a la vida », « provocacion a l'òdi a rason de l'origina » e « injúrias publicas a rason de l'orientacion sexuala »[3]
Publicacions modificar
Benda dessenhada modificar
A la fin de las annadas 2010, lo contengut del blòg de Papacito dobèrt en 2012, « FDP de la mode » (« FDP » per « filh / hilh de puta »), es adaptat en benda dessenhada pel dessenhaire francés Marsault e publicat en dos tòms per las edicions Ring :
- FDP de la mode I - Enculé va !, 2018.
- FDP de la mode II - L'ultime croisade, 2019.
Sortís una novèla benda dessenhada en 2023, totjorn en collaboracion ambe Marsault, que se ditz Expérience de mort imminente, publicat a las edicions Magnus.
Libres modificar
Papacito es l'autor de quatre libres en francés, tres publicats per las edicions Ring, Carnets de guerre en 2018 (promovent lo machisme, lo virilisme e la violéncia), Crépuscule des titans en 2019, Expédition punitive en 2020 (una apologia del mond militar), e Siècle furieux en 2022, publicat per las edicions Magnus.
Revista modificar
En genièr de 2022, Papacito, Laurent Obertone e Marsault lançan la revista La Furia que pareis cada trimèstre.
Referéncias modificar
- ↑ Papacito : barbare christianisé https://lincorrect.org/papacito-barbare-christianise-lincorrect/
- ↑ Soupçonné de harcèlement moral contre le maire de Montjoi, l'éleveur porcin Pierre-Guillaume Mercadal a été déféré ce mercredi 7 février 2024 au palais de justice de Montauban https://www.ladepeche.fr/2024/02/07/leleveur-qui-avait-jete-un-cochon-mort-sur-le-bureau-du-maire-de-montjoi-sera-juge-pour-harcelement-moral-11749988.php
- ↑ Maire de Montjoi attaqué par Papacito : six mois de prison avec sursis requis contre l’influenceur d’extrême droite https://www.ladepeche.fr/2024/02/28/maire-de-montjoi-attaque-par-papacito-six-mois-de-prison-avec-sursis-requis-contre-linfluenceur-dextreme-droite-11794144.php