Pòbles indigènas de Brasil
Lei pòbles indigènas de Brasil (« povos indígenas no Brasil » en portugués) ò brasilians natius (« nativos brasileiros ») son un ensems de pòbles d'originas variadas qu'èran installats en Brasil avans l'arribada deis Europèus a la fin dau sègle XV. Son sovent dichs indians (« índios ») en causa de l'error geografica de Cristòl Colomb que pensava èsser arribat ais Índias.
Au començament dau sègle XVI, la màger part dei pòbles indigènas de Brasil formavan de tribús seminomadas que son economia èra basada sus la caça, la pesca, la culhida e l'agricultura itineranta. Lo nombre de tribús qu'existián d'aqueu temps es estimat a aperaquí 2 000 per leis istorians modèrnes. Aurián gropat entre 5 e 15 milions d'abitants. Pasmens, coma per lo rèsta dau continent, l'installacion deis europèus entraïnèt un declin rapide dei populacions indigènas en causa dei malautiás importadas per lei colons e leis esclaus, dei conflictes entre indigèns e colons e de l'assimilacion deis indigèns au sen de la societat europèa.
En 1970, un recensament enregistrèt solament 100 000 indigèns, çò qu'entraïnèt l'adopcion progressiva de legislacions de proteccion e de promoccion culturala en favor dei pòbles natius dau país. Aquelei politicas se concentran sustot sus lei regions onte la societat indigèna es pas encara assimilada per la societat europèa. A favorizat una renaissença culturala dei pòbles indigèns e una aumentacion demografica. dei comunautats. Ansin, lei recensaments de 1991, de 2000 e de 2010 an respectivament enregistrat 294 000, 734 000 e 987 000 Brasilians que s'identificavan coma « Indians ». Pasmens, lei pòbles indigèns representavan totjorn una minoritat fòrça pichona de la populacion e son mòde de vida es fòrça menaçada per la disparicion de la Seuva Amazonica.