Nicholas Winton
Nicholas Winton, nascut Nicholas Wertheim, (19 de mai de 1909 - 1èr de julhet de 2015) foguèt un corratier britanic qu'organizèt l'evacuacion d'enfants jusieus checoslovacs en 1938 e 1939 menaçats per lei Nazis après l'ocupacion dau país per Alemanha. Per aquò, aprofichèt una lèi votada per la Chambra dei Comunas que permetiá de donar l'estatut de refugiat a un enfant de mens de 17 ans a condicion de li trobar una familha d'acuelh e de depausar una caucion de 50 liuras per un viatge de retorn eventuau. Nicholas Winton organizèt la partença de 8 trens que permetèron de sauvar 669 enfants. Un noven foguèt en revènge interceptat per leis Alemands entraïnant la disparicion dei 250 enfants a bòrd.
Son accion foguèt descubèrta per azard per sa frema que trobèt en 1988 lei documents utilizats per son marit per organizar lei viatges e lei letras dei parents demandant son ajuda. Ja membre de l'Òrdre de l'Empèri Britanic dempuei 1983 per d'accions en favor de la creacion de residéncias per retirats, recebèt una tiera de recompensas e d'omenatges. Foguèt guierdonat de l'Òrdre Tomas Garrigue Masaryk (1998), de la Crotz dau Meriti dau Ministèri de la Defensa de la Republica Chèca (2008) e l'Òrdre dau Lion Blanc (2014). Foguèt tanben anoblit per la rèina Elisabèt II en 2002 e declarat Eròi britanic de l'Olocaust en 2010 per lo govèrn de Londres. Plusors films e documentaris foguèron egalament realizats sus son òbra e son nom foguèt donat a divèrseis estacions de tren ò de mètro, escòlas e mai a un asteroïde (19384 Winton).