New beat

La new beat es una musica electronica, mai precisament un sosgenre local de la house avent emergit a l'oèst d'Euròpa a la fin de las annadas 1980 just abans la tècno. Coma sosgenre de la house, la new beat es estada una musica contemporanèa de la dicha house dins sa periòda comerciala europèa, precisament entre 1987 e 1990, puèi a progressivament desapareguda jos la tècno pendent las doas annadas 1991-1992 de transicion.

Çò que permet d'identificar sulcòp la new beat, es sa ritmica puslèu lenta per de musica electronica, entre 90 e 110 bpm (trucs per minuta) maximum. La legenda conta d'alhors qu'es justament en passant lo 45 torns Flesh de 1986 del grop synthpop bèlga A Split Second en vitessa mai lenta (33 torns) qu'un discjòquei de Belgica a inventat de faiçon quasi accidentala lo son new beat, expression que's pòt revirar en occitan per "novèla ritmica". L'idèa de ralentir la vitessa d'enregistraments originals per obtenir aquela sonoritat estranha e inedita es estada còp-sèc copiada per d'autres discjòqueis bèlgas e dels païses frontalièrs ; la dicha sonoritat e ritmica a alavetz servit de basa a las produccions house localas a partir de 1987.

Lo tèrme new beat designa tanben la scèna e soscultura musicala alternativa bèlga de la fin de las annadas 1980 d'aquela periòda.

Estili de house endemic d'Euròpa Occidentala, es donc mai precisament en Belgica que la new beat a agut lo mai gròs impacte cultural, vertadièr fenomèn de societat dins aquel Estat, los grops mai emblematics de new beat essent bèlgas : Confetti's, 1O1, Bassline Boys... Aital, lo cantaire bèlga Stromae assumís èsser estat influenciat per la new beat per sa musica. Se pòt tanben trobar un resson de la new beat dins d'unes tròces del disjoquèi francés Vitalic coma per exemple Waiting For The Stars en 2016.

Malgrat que l'estili siá aparegut en Belgica en 1987, s'es lèu propagat dins los païses limitròfs, los Païses Basses, lo Nòrd-oèst d'Alemanha e lo Nòrd de França, la new beat avent pas agut qu'un pichon impacte en Bretanha, en Occitània o dins los païses de cultura latina coma Espanha, Portugal o Itàlia. Foguèt tanben un estili localizat a la part continentala d'Euròpa Occidentala, la new beat a agut chic de resson dins las Illas Britanicas.

Quitament sosgenre de la house, la new beat intègra pr'aquò d'elements d'autras musicas electronicas coma la Hi-NRG e la synthpop, e sustot l'EBM qu'es, coma la new beat, un estili endemic de l'oèst d'Euròpa. Aquò explica que i aguèt produccions bèlgas etiquetadas de còps new beat, de còps EBM.

Coma sinonim de new beat, s'emplegava tanben de còps lo tèrme acid music o acid house, dins lo cas alavetz d'una filiacion assumida ambe la house primitiva del nòrd-èst american del mièg de las annadas 1980 (de Detroit, Chicago e Nòva York).

Qualques grops emblematics de la new beat

Confetti's, Belgica. Pas forçalament lo mai representatiu de l'estili, mas segurament lo mai conegut fòra de la sola Belgica.
Hithouse, Païses Basses.
Bassline Boys, Belgica.
1O1, Belgica. Conegut per la version europenca de Rock to the beat, escur tròç house de l'american Kevin Saunderson (Detroit). La version en França foguèt la edulcorada de la formacion bessona One O One Electric Dream, après n'aver tirat los mots dins lo tròç que, dins sa version bèlga, fasián explicitament referéncia al consum de drògas.
Lords of Acid, Belgica. En mai de 1O1, Maurice Joseph François Engelen, dich de còps Praga Khan, participa al projècte electro Lords of Acid. Pasmens, i pas consensus per etiquetar new beat aquesta formacion, considerada plan sovent puslèu com un grop pionièr de la tècno.
Amnesia, Belgica.
Pleasure Game, Belgica e França. Pleasure Game foguèt una formacion emblematica de la mutacion de la new beat en tècno, e segon lo cas n'i a que dison que lor primièr tube Le Dormeur en 1991 se pòt considerar coma l'un dels primièrs del genre tècno, mentre que d'autres estiman que s'agís sonque de house tardiva, de new beat mai precisament vist que lors sòcis son de Belgica (eissits del grop new beat Amnesia) e del nòrd de França (Boris).
Technotronic, Belgica. Un pauc coma lo cas Pleasure Game, i a pas consensus sus l'etiqueta new beat de còps atribuïda a n'aqueste grop hip-house eurodance que el tanben assegura la transicion entre la house tardiva e la tècno.
Age of Love, Belgica, Itàlia. Grop de new beat tardiva, es de còps puslèu considerat coma precursor de la tècno, e mai especificament del sosgenre dream trance.
The Maxx, França.
Taste of Sugar, Belgica.
Front 242, Belgica. Grop puslèu emblematic de l'EBM, la parentat entre aqueste derivat de la new wave ambe la house que la new beat n'es eissida, e sustot lo fach que Front 242 es un grop bèlga, fa que foguèron de còps etiquetats new beat a l'epòca. Pasmens, objectivament, es un grop d'EBM.
Dobel You, Belgica, França. Aqueste duò puslèu de synthpop tardiva es de còps aparentat new beat, pr'amor de la geografia (Belgica e Nòrd de França) e del fach que foguèron actius pendent l'atge d'aur de la new beat.

Vejatz tanben

House
Tècno
Vidèo Youtube en francés : "La New Beat : le phénomène electro belge" https://www.youtube.com/watch?v=QMHgTJw9Sgg