Lengadòc-Rosselhon

Lengadòc-Rosselhon (Llenguadoc-Rosselló en catalan; Languedoc-Roussillon en francés) es una anciana region administrativa de França, situada en Occitània (per la màger part) e en Catalonha (per lo departament dels Pirenèus Orientals, levat lo parçan de Fenolhedés qu'es occitan).

Lengadòc-Rosselhon

Languedoc-Roussillon (fr)
(Bandièra)
Nom oficial	Languedoc-Roussillon (fr)
Administracion
Capitala	Montpelhièr
Geografia
43° 40′ 00″ N, 3° 10′ 00″ E
Estat	França
Superfícia	23 376 km²
Fus orari	UTC+01:00 (ora estandard) UTC+02:00 (ora d'estiu)
Demografia
• Totala	2 729 721 ab. (2013 )
• Densitat	116,77 ab./km²
Autras informacions
ISO 3166-2	FR-K

Compreniá los departaments de Losera, Gard, Erau, Aude e dels Pirenèus Orientals.

Son capluòc èra Montpelhièr. Son còde INSEE èra 91.

Istòria

La region de Lengadòc e Rosselhon es creada coma circonscripcion d'accion regionala lo 2 de junh de 1960. Ven un establiment public regional lo 5 de julhet de 1972. La « lei Deferre » (lei n°82-213 del 2 de març de 1982) ne fa una collectivitat territoriala de l'executiu elegit e partatja las competéncias entre l'Estat e las regions. Ven una collectivitat territòriala après las eleccions del 16 de març de 1986.

Los projèctes de refòrma territoriala de 2014 preveson la fusion amb Miègjorn-Pirenèus. Lo Senat francés vòta per manténer las doas regions en octobre de 2014. Finalament la fusion es votada en genièr de 2015.

Estructuracion urbana

La region es largament dominada per l'aglomeracion de Montpelhièr. Es un fenomèn recent, que tradusís una metropolizacion, una concentracion de la populacion e de las activitats dins las aglomeracions mai importantas.
En 1954, la populacion municipala de las principalas vilas de Lengadòc-Rosselhon, Montpelhièr, Nimes, Perpinhan e Besièrs èra respectivament de 97 501, 89 130, 70 051 e 64 929 abitants. La comparason de las populacions de las aglomeracions donariá de resultats pauc diferents, estant que las 4 vilas an una superficia importanta. Tanlèu 1968, las donadas èran 161 910, 123 292, 102 191 e 80 481 abitants. Per çò qu'es de las unitats urbanas ara, las populacions en 2019 èra respectivament de 458 189, 183 471, 203 025 e 93 623 abitants. Se vei clarament, en mai de l'aviada de Montpelhièr, que Nimes patís mai de la concurréncia de la capitala regionala que Perpinhan, pr'amor de sa proximitat e que Besièrs coneis una vertadièra estagnacion, aquò per tres rasons : es la sola de las quatre desprovesida d'una foncion prefectorala e, coma Nimes, es a pauc de distància de Montpelhièr; en mai d'aquò, Besièrs èra tròp dependenta del vin (e dejà en crisi abans 1954).