Hermann Wilhelm Göring (12 de genier de 1893, Rosenheim – 15 d'octòbre de 1946, Nurembèrg) èra un òme politic e un militar alemand que foguèt una figura majora dau nazisme e dau Tresen Reich. Cap de la Luftwaffe e ministre de l'Èr, foguèt condamnat a mòrt en causa de sa participacion ai crimes de l'Alemanha Nazi per lo tribunau de Nuremberg.

Fotografia d'Hermann Göring en 1932.

Pilòt e as alemand de la Premiera Guèrra Mondiala, venguèt sòci dau partit nazi tre 1923. Foguèt bleçat durant lo putsch de la braçariá e desvolopèt una dependéncia a la morfina utilizada per lo sonhar. En 1933, après la presa dau poder per Hitler, venguèt lo segond personatge dau regime. Fondèt la Gestapo en 1933 avans d'èsser nomat cap de la Luftwaffe en 1935. Recebèt tanben pauc a pauc de foncions regardant l'organizacion de l'economia alemanda. En 1941, foguèt oficialament designat coma successor per Hitler

Pasmens, son influéncia e son poder demesiguèron après 1942. Incapable de mantenir lei capacitats de l'aviacion alemanda, se retirèt pauc a pauc deis afaires publics per se concentrar sus sa colleccion d'art formada a partir dei bens confiscats ai victimas daus camps alemands. Lo 22 d'abriu de 1945, aprenguèt lei projèctes de suicidi d'Adolf Hitler e demandèt au Führer l'autorizacion d'assegurar la direccion dau Reich. Dins aquò, Hitler considerèt la requèsta coma una traïson e ordonèt son arrestacion.

Après la Segonda Guèrra Mondiala, Göring foguèt lo pus important responsable nazi capturat per leis Aliats e jutjat ai Procès de Nuremberg. I foguèt reconegut copable de complòt e de crimes còntra la patz, de crimes de guèrra e de crimes còntra l'Umanitat e condamnat a mòrt.

Aviá un fraire cadet, Albert Göring, que resistiguèt au regime nazi e organizèt l'evasion de judieus e d'opausants.

Liames intèrnes modificar

Bibliografia modificar

Nòtas e referéncias modificar