Fidias
Fidias (mòrt vèrs 430 avC) es un escultor grèc dau sègle V avC.
Sa vida es fòrça mau coneguda. Nasquèt en Atenas e participèt a la batalha de Maraton (490 avC). Puei, aprenguèt l'escultura a l'escòla d'Argos ambé Miron e Policlèt. Sa carriera s'estend probablament de 479 a 432 avC.
Protegit de Pericles, es l'autor de plusors òbras majoras dau periòde classic atenenc e aguèt un ròtle major dins la reconstruccion dau Partenon destruch per lei Pèrs en 480-479 avC. En particular, realizèt l'estatua criselefantina d'Atena Partenos e supervisèt l'execucion de plusors frisas dau temple. En 437 avC, anèt a Olimpia onte realizèt l'estatua criselefantina de Zeus olimpian que foguèt considerada coma una dei Sèt Meravilhas dau Mond. Pasmens, a son retorn dins sa ciutat, deguèt faciar plusors accusacions de corrupcion e d'impietat destinadas a afeblir Pericles. Foguèt alora exiliat a Olimpia onte moriguèt.