Centurion (carri de combat)
Lo carri Centurion es un carri de combat britanic considerat coma lo premier carri de combat principau intrat en servici. Desvolopat durant la Segonda Guèrra Mondiala, intrèt en servici en 1945 après la fin dei combats. 4 423 unitats foguèron produchas e 20 país l'adoptèron, generalament de membres de l'OTAN ò dau Commonwealth. En causa d'aqueu succès, un nombre fòrça important de versions foguèt concebut. Entraïnèron l'aumentacion de la poissança de fuòc amb lo passatge progressiu dau calibre dau canon de 76 a 105 mm. Lo blindatge foguèt tanben renfòrçat, çò que menèt a una aumentacion de la massa generala de 43,1 a 51,8 t. En 2012, certanei versions èran totjorn en servici.
Lo Centurion participèt a plusors conflictes. Lei pus importants foguèron la Guèrra de Corèa onte lo carri obtenguèt de resultats fòrça satisfasents còntra lei carris mejans e pesucs d'origina sovietica confiermant la validitat dau concèpte de carri de combat principau. En Orient Mejan, participèt ai guèrras d'Israèl còntra sei vesins arabis. Força modernizat, i obtenguèt de resultats favorables còntra lei T-55 e T-62 sirians dins la region de Golan (300 carris sirians destruchs còntra 80 blindats israelians en 1973) e venguèt lo simbòl de la poissança deis unitats blindadas israelianas. Enfin, la version sud-africana participèt ai operacions en Angòla onte deguèt faciar de T-34, T-55 e T-62 cubans amb de resultats mau coneguts.
Liames intèrnes
modificarBibliografia
modificar- (en) S. Dunstan, M. Badrocke e F. Sarson, Centurion Universal Tank 1943-2003, Osprey Publishing Ltd, 2003.