Cantharellus cibarius
Aurelhetas
Règne | Fungi |
---|---|
Division | Basidiomycota |
Sosdivision | Agaricomycotina |
Classa | Agaricomycetes |
Òrdre | Cantharellales |
Familha | Cantharellaceae |
Genre | Cantharellus |
Cantharellus cibarius (del latin Cantharellus diminutiu de kántharos: copa; cibarius: comestible) es un tipe de campairòl excellent comestible e fòrça recercat.
Noms en occitan modificar
aurelheta, bochingon, bochinguela, boli(n)gola, cabrilha, escrabilha, escaravilha, (es)caramilh, caramilha, cassena, charliste, cresta de gal, creston de gal, galhistron, (d)orlhon, foseta, fosilon, girodela, giraudela, giralon, girondela, girboleta, girela, giròla, girgola, jaunet, jauneta, lecacina/lecassina/lacassina (" iranjada), lecacendres, mossairon, musselina, rojarís, tinterilha, tantarilha, tornabòus...
Dins las Valadas se ditz garibola (Val d'Ols), garítola o garita (Val Sant Martin, Lo Vilar de Pèlis), ulheta a Salbertrand, la gratolina o jalineta a Cartinhan, la cacaròta a Montrós, l'aurelhina [ourihina] o la boleïna a Vernant e a Rocavion.
Descripcion modificar
Es pron massís e de color jaune-daurat o iranjat, mas lo pè es mai atenuat a la basa. Lo capèl, de 4 a 10 cm., d'en primièr es convex, après aplanat-deprimit e finalament en forma d'embut; lo sieu marge es ondulat. Fa una odor agradiva, fruitada, e lo sieu gost es doç.
Las gerilhas an la particularitat de pas s'envermenar jamai e se pòdon culhir fòrça jorns après la siá naissença. Quora se fa vièlh, negreja a las puntas del capèl e lo jaune ven marron.
Abitat modificar
Se tròba als bòsques de planifolis (eusièras, siuredas, fagedas, castanhedas e rovièras) e coníferes, dempuèi la prima fins a la tardor, segon la pluèja.
Gastronomia modificar
Se pòt preparar dins de plats cosinats e es bon per secar o salar. Se pòt tanben manjar cru.
Perilh de confusion modificar
I a dos bolets que se semblan a la gerilha amb una coloracion similara. Aqueles son, la falsa gerilha (Hygrophoropsis aurantiaca), qu'es comestible amb prudéncia, e la girgola d'olivièr (Omphalotus olearius), qu'es toxica.