Cançonièr trobadoresc

Los cançonièrs èran lo mejan per que se transmetèt la poesia trobadoresca.

La poesia trobadoresca (un còrpus de mai de 2.500 poesias d'unes 450 trobadors e trobairitz) se conservèt sonque dins de cançonièrs, recuèlhs de poesias fachs gaireben totes dins als sègles XIII e XIV e copiats en Itàlia (mai de la mitat), Catalonha (una desena), Occitània (una cinquena part) o al nòrd de França (unes 14).^[1] Se conservan pas de manuscrits de joglar ni, tampauc, d'autografs. I a tanben a l'escasença de poesias, o simplament d'estròfas, que son presentas solament en citacion dins de gramaticas o de tractats poetics. D'autras poesias, mai sovent sonque de fragments, se conservan dins los tèxtes de las vidas, tanben copiadas dins los cançonièrs. Domoran près d'un centenat de cançonièrs; mas unes son solament de fragments d'unes fulhets qu'a vegada los sabents classifican pas coma cançonièr independent mas que l'associan al cançonièr a que semblan mai. Unes cançonièrs conservan de poesia trobadoresca e de poesia francesa.

Als cançonièrs escrichs sus pergamin se los donan de siglas en letras majusculas e als cançonièrs escriches sus papièr, de minusculas. Lo sistèma de siglas foguèt introdusit per Karl Bartsch.^[2] Als cançonièrs descobèrts mai tard se los dona de siglas en seguent l'òrdre alfabetic o en apondent de letras addicionalas en sosindex (vejatz los cases de Sg o VeAg).

Contengut

Los cançonièrs còpian abitualament las poesias ordenadas per genres o per autors. Cal notar qu'a vegada diferents cançonièrs atribuisson una mèsma poesia a diferents autors. Aquò se pòt passar quitament a l'interior d'un quita cançonièr.

Qualques cançonièrs comprenon de vidas, de biografias brèvas dels trobadors, que sovent son de rubrucas inseridas al recuèlh de sas poesias o tanben reculhidas a despart. E tanben rasons, de pichons escrits qu'explican las circonstàncias que s'escriguèt una poesia.

De cançonièrs comprenon d'enluminaduras que fan lo retrach, plan segur pas de biais realista, dels trobadors e trobairitz. Las miniaturas illustran sovent d'aspèctes mencionats dins la vida del trobador; se la vida ditz qu'acabèt sos jorns dins un convent, èra presentat coma monge; se la vida ditz que fasiá de bona musica, se lo representa amb un instrument, eca. Los cançonièrs A, H, E, K contenon d'enluminuras al bòrd de las vidas dels trobadors. D'autres cançonièrs (C, E, M, N, R) contenon tanben d'enluminuras mas sens relacion amb la vida e la seleccion de poesias del quita trobador.

Quatre cançonièrs (G, R, W e X) an conservat, en mai, la notacion musicala de las pèças. Dins l'ensems, se conservan 265 melodias de poesias trobadorescas, es a dire, una desena partida de tot lo corpus trobadoresc.^[3]

Taula dels principals cançoners de la poesia trobadoresca

^[4]

Sigla del cançoner	Provenença / Data	Localitzacion actuala	Signatura	Nòtas
A	Lombardia, Segle XIII	Biblioteca Vaticana, Roma	Latini 5232	Amb 45 minaturas que representan de trobadors e trobairitz
B	Occitània, Sègle XIII	Bibliotèca Nacionala de França, París	BN f.f. 1592
C	Occitània, Sègle XIV	Bibliotèca Nacionala de França, París	BN f.f. 856	Conté 1206 composicions; es aquel que ne conten lo mai^[5] Reproduccion fotografica sus Gallica
D	Lombardia, 12 d'agost de 1254 (la primera partida)	Biblioteca Estense, Modena	Kg.4.MS2=E.45=α.R.4.4	Despartit en quatre, la darrièra es lo florilegi de Ferrarino Trogni da Ferraraa, començement de sègle XV. Disponible en linha
E	Occitània, Segle XIV	Bibliotèca Nacionala de França, París	BN f.f. 1749	Reproduccion fotografica sus Gallica
F	Lombardia, Sègle XIV	Biblioteca Vaticana, Roma	Chigi L.IV.106
G	Lombardia o Vènet, fin del sègle XIII	Biblioteca Ambrosiana, Milan	R 71 sup.	Conten de notacions musicalas
H	Lombardia, fina del sègle XIII	Biblioteca Vaticana, Roma	Latini 3207	Amb 8 minaturas que representan de trobairitz: Almucs de Castelnòu, Beatritz de Diá (dos retrachs), Iseut de Capio, Maria de Ventadorn, Lombarda, Tibors de Sarenom e una trobairitz anonima.
I	Lombardia, Segle XIII	Bibliotèca Nacionala de França, París	BN f.f. 854	Amb 91 minaturas que representan de trobadors e trobairitz. Reproduccion fotografica sus Gallica
J	Occitània, Sègle XIV	Biblioteca Nazionale, Flornça	Conventi Soppressi F.IV.776
K	Lombardia, Segle XIII	Bibliotèca Nacionala de França, París	BN f.f. 12473	Amb 79 minaturas que representan de trobadors e trobairitz. Reproduccion fotografica sus Gallica
L	Lombardia, Sègle XIV	Biblioteca Vaticana, Roma	Latini 3206
M	Lombardia, Segle XIV	Bibliotèca Nacionala de França, París	BN f.f. 12474	Reproduccion fotografica sus Gallica
N	Lombardia, Fin del sègle XIII	Pierpont Morgan, Nòva York	819	Apartenguèt a Sir Thomas Phillips
O	Lombardia, Sègle XIV	Biblioteca Vaticana, Roma	Vat. Lat. 3208
P	Lombardia, 1310	Biblioteca Laurenziana, Florença	XLI.42
Q	Lombardia, Sègle XIV	Biblioteca Riccardiana, Florença	2909
R	Regió de Tolosa o Roergue, Sègle XIV	Bibliotèca Nacionala de França, París	BN f.f. 22543	Cançonièr La Vallière. Conten un grand nombre de peças amb de notacions musicalas. Es lo cançonièr que'n conten lo mai. Reproduccion fotografica sus Gallica
S	Lombardia, Sègle XIII	Bodleian Library, Oxford	Douce 269
Sg	Catalonha, Sègle XIV	Biblioteca de Catalonha, Barcelona	146	Cançonièr Gil; sigla Z, segon Zufferey
T	Lombardia, fin del sègle XIII	Bibliotèca Nacionala de França, París	BN f.f. 15211	Reproduccion fotografica sus Gallica
U	Lombardia, Sègle XIV	Biblioteca Laurenziana, Florença	XLI.43
V	Catalonha, 1268	Biblioteca Marciana, Venècia	278, fr. App. cod. XI	Compilat per R. de Capellades
V^eag	Catalonha, Segle XV	Biblioteca de Catalunya, Barcelona	7, 8	Cançonièr Vega-Aguilon
W	benlèu en Artés, 1254–c. 1280	Bibliotèca Nacionala de França, París	BN f.f. 844	Conten de notacions musicalas. Conten tanben de poesia francesa (de Trovèrs; conegut com un cançonièr M per la poesia dels trovèrs). Chansonnier du roi benlèu fach per a Carles d'Anjou. Reproduccion fotografica sus Gallica
X	Lorena, Segle XIII	Bibliotèca Nacionala de França, París	BN f.f. 20050	''Chansonnier de Saint-Germain-des-Prés'', que n'èra lo propietari al sègle XVIII. Conten de notacions musicalas. Conten tanben de poesia francesa (de Trovèrs; conegut coma cançonièr U per la poesia dels trovèrs). Reproduccion fotografica sus Gallica
Y	França/Lombardia, Sègle XIII	Bibliotèca Nacionala de França, París	BN f.f. 795
Z	Occitània, Sègle XIII	Bibliotèca Nacionala de França, París	BN f.f. 1745
a		Biblioteca Riccardiana, Florença	2814	Copia facha per Jaume Teissier de Tarascon d'un cançonièr perdut compilat per Bernart Amoros. Conservat en doas partidas: a e a¹.
a¹		Biblioteca Estense, Modena	Càmpori Appendice 426, 427, 494 (olim Gamma.N.8.4.11–13)
b	Itàlia, Segle XVI	Biblioteca Vaticana, Roma	Barberini 4087	Còpia d'un cançonièr perdut de Miquel de la Tor.
c	Itàlia, Segle XV	Biblioteca Laurenziana, Florència	XC if 26
f	Occitània, Segle XIV	Bibliotèca Nacionala de França, París	BN f.f. 12472	Cançoner Giraud. Reproduccion fotografica sus Gallica

Referéncias

↑ Paden, p. 309
↑ Grundriss zur Geschichte der provenzalischen Literatur, Elberfeld, 1872, p. 27-31
↑ Riquer, Los trovadores, p. 14: "256 melodías trovadorescas conservadas"
↑ Riquer, Los trovadores, p. 12-13
↑ Paden, p. 310

Bibliografia

William D. Paden, Manuscripts, in: F. R. P. Akehurst / Judith M. Davis (eds.), A Handbook of the Troubadours, Berkeley, University of California Press, 1995, pàg. 307-333
Martí de Riquer, Los trovadores. Historia literaria y Tèxtes. Barcelona: Ariel, 1983, vòl. 1, pàg. 12-14 [Listat de cançonièrs]
François Zufferey, Recherches linguistiques sur las chansonniers provençaux, París, Droz, 1987 (Publications romanas te françaises; 176)

[1] Paden, p. 309

[2] Grundriss zur Geschichte der provenzalischen Literatur, Elberfeld, 1872, p. 27-31

[3] Riquer, Los trovadores, p. 14: "256 melodías trovadorescas conservadas"

[4] Riquer, Los trovadores, p. 12-13

[5] Paden, p. 310

[1]

[2]

[3]

[4]

[5]