Bunhac (Lauragués)

Bunhac (Bugnac en francés) es una anciana parròquia e comuna lengadociana en Lauragués, situada dins lo departament de la Nauta Garona e la region administrativa d'Occitània, ancianament de Miègjorn-Pirenèus. Dempuèi 1847, es incorporada dins la comuna de Tarabèl.

Geografia

I a pas de vilatge del nom de Bunhac, un ostal o dos, prèp de la RD 38, al sud de Tarabèl.

Toponimia

Xavier Delamarre cita un Buniac (escrit puslèu Buniat sus las mapas modèrnas, Bugniac sus la mapa de Cassini, al sègle XVIII), Buinhac al sègle XIV, comuna de Lapte, en Velai, qu'explica per un celtic Būniācon, « la proprietat de Būnios », nom atestat (Bunius, en latin) ^[1]. I a pas de rason de refusar la meteissa explicacion pel Bunhac lengadocian.

Istòria

Pendent l'Ancian Regime, Bugnac (Bunhac) èra de la diocèsi civila de Tolosa, doncas de la província de Lengadòc, de la generalitat de Tolosa, de l'archidiocèsi de Tolosa e de la senescauciá de Lauragués. Le vocable de la glèisa, dispareguda al sègle XVIII, èra Sant Pèire. En 1790, Bunhac èra una comuna del canton de Lantar. Bunhac fusionèc ambe Tarabèl provisòriament entre 1791 e l'an VIII, tornèc paréisser en l'an X, puèi fosquèc annexada definitivament per ordenança del 6 de febrièr 1847^[2]. Sus la mapa actuala, lo nom de Bunhac es a 500 m al sud de Tarabèl e sus la mapa de Cassini se vei una glèisa arroïnada del nom de St Peyre. Las doás glèisas èran tròp prèpas per subreviure totas doás e Bunhac èra pus pichon que Tarabèl (un centenat d'abitants contra 3 o 400).