Bob Beamon
Robert Beamon, dich Bob Beamon (nascut lo 26 d'aost de 1946, Nòva York) es un atlèta estatsunidenc especialista dau saut de lòng. Es famós per son recòrd dau mond (8,90 m) realizat durant lei Jòcs Olimpics de Mexic que demorèt en vigor de 1968 a 1991. Gràcias a aqueu saut, ganhèt la medalha d'aur de la disciplina dei Jòcs d'Estiu de 1968.
Biografia
modificarOriginari de Nòva York, Bob Beamon foguèt remarcat per l'entranaïre Larry Ellis que lo dirigiguèt vèrs l'atletisme. Aquò li permetèt d'intrar a l'Universitat de Carolina dau Nòrd avans de venir estudiant de l'Universitat de Tèxas. Obtenguèt plusors resultats de remarca durant sa carriera universitària coma un recòrd universitat de triple saut (1965), una segonda plaça au concors de saut de lòng ai campionats universitaris (1965) e una segonda plaça, tornarmai en saut de lòng, ai Jòcs Panamericans de 1967. Suspendut per aver participat a un movement de boicòt denonciant la situacion deis atlètas negres, se raprochèt de Ralph Boston (nascut de 1939), medalha olimpic d'aur 1960 e d'argent 1964 de saut de lòng, que l'ajudèt dins son entraïnament.
Après un saut de 8,33 m, Beamon fasiá partida dei favorits de l'espròva de saut de lòng dei Jòcs Olimpics de Mexic en 1968. Pasmens, deviá faciar la concurréncia de Ralph Boston e dau Sovietic Igor Ter-Ovanessian qu'èran codetentors dau recòrd dau mond (8,35 m). Ansin, lo premier assai de Beamon dins lo concors foguèt una suspresa totala qu'agantèt una distància de 8,90 m. Aquò melhorava lo recòrd precedent de 55 cm e li permetèt de ganhar aisament la medalha d'aur. Sa performància intrèt tanben dins l'istòria de l'atletisme modèrne.
Vengut famós après aquela victòria, Beamon arrestèt sa carriera d'atlèta en 1969 e assaièt de venir jogaire professionau de basquet. Pasmens, recrutat per lei Phoenix Suns, joguèt ges de partida, probablament en causa d'una talha tròp pichona (1,91 m). Après aquela revirada, passèt un diplòma de sociologia (1972) e participèt regularament a d'operacions de promoccion de l'atletisme.
Palmarès
modificarEn despiech d'una carriera relativament brèva, Bob Beamon a un palmarès relativament ric fach d'una medalha d'aur ai Jòcs Olimpics de 1968 e d'una medalha d'argent ai Jòcs Panamericans de 1967. Foguèt tanben lo detentor dau recòrd dau mond de saut de lòng de 1968 a 1991.