Antigòna (Montpelhièr)
Antigòna es un quartièr de Montpelhièr concebut par l'arquitècte catalan Ricardo Bofill a partir de 1977 jol vam del cònsol màger Georges Frêche. La majoritat dels immòbles foguèt bastit dins un estil inspirat par l'arquitectura de la Grècia antica segon lo projècte de l'arquitècte seguent un axe que se vòl far resson a l'èst d'aquel qu'estructurèt la vila a l'oèst, amb la passejada del Peiron e l'Aqüeducte dels Arcs.
.JPG)
Lo quartièr se situa al sud-èst del centre vila, dins lo « poligòn » qu'èra l'ancian camp de tir de la casèrna Joffre. S'espandís dempuèi lo centre comercial del Poligòn fins a Les lo long d'una perspectiva de prèp de 900 mètres. En riba esquèrra, l'Ostal de la Region de Lengadòc-Rosselhon tanben bastit per Ricardo Bofill es d'una arquitectura similara d'aquela d'Antigòna.
L'asegatge del quartièr foguèt acabat al començament dels ans 2000 amb tres grands equipaments: la Piscina olimpica (1996), la mediatèca centrala Émile Zola e lo passatge de la linha 1 del tramvia. La traucada d'un immòble de la plaça del Nombre d'Aur a la meteissa epòca permetèt de crear una perspectiva complèta del Poligòn fins al Conselh Regional e de facilitar la circulacion dels pedons que pòdon veire dins lors passejadas fòrça copias d'esculturas grecoromanas celèbras, coma la Victòria de Samotràcia, la Vènus d'Arle, la Diana amb la cèrva o Zèus.
Antigòna foguèt la primièra granda etapa dins l'urbanizacion del sud-èst de la vila prèp de Les seguida per l’adobament del quartièr de Richter a l'entorn dels UFR d'AES e de las Sciéncias economicas de l'Universitat de Montpelhièr 1 el meteis seguit cap a l'èst pel complèxe comercial e de leser d'Odysseum.
Mercé a l'adobament de las ribas de Les, los terrens fins alara pas constructibles se poguèron urbanizar permetent a la vila de se trobar un novèl axe de Les cap a la mar.
