Sinecisme
Un sinecisme es un acte politic caracteristic de l'Antiquitat grèga. Permetiá de reünir plusors vilatges o vilas per formar una ciutat novela, generalament sus una basa egalitària. Aquò èra sovent acompanhat per l'adopcion d'un nom novèu per designar l'entitat formaa, per la construccion d'una agòra e de fortificacions e per l'amainatjament d'un santuari religiós dedicat a una divinitat protectritz comuna. Lo sinecisme es un fenomene relativament frequent e los mai ancians semblan de datar dau periòde protoistoric[1]. Pasmens, de reünions contunhèron fins a la fin dau sègle I avC[2]. Fòrça ciutats grègas, coma Atenas, Esparta o Megalopolis, èran ansin eissias d'un sinecisme.
Un mecanisme juridic similar existissiá en Itàlia dins l'espaci etrusc[3]. En particular, Roma foguèt probablament fondaa a l'eissia d'un sinecisme entre plusors vilatges que chausiguèron lo Capitòli coma centre comun.