Richard Sorge

Richard Sorge (4 d'octòbre de 1895, Bakó - 7 de novembre de 1944, Tòquio) es un revolucionari e un jornalista alemand e sovietic de l'entre doas guèrras e de la Segonda Guèrra Mondiala. Es famós per son ròtle d'espion en Japon en 1940-1941.

Richard Sorge en 1940.

Biografia

Volontari de l'armada alemanda durant la Premiera Guèrra Mondiala, foguèt grèvament bleçat en març de 1916. Desmobilizat, legiguèt leis òbras de Karl Marx durant sa convalescéncia e venguèt comunista. En 1920, perdiguèt son emplec en causa de seis idèas e anèt en URSS. Foguèt alora encargat de missions d'espionatge per lei bolchevics e s'entornèt dins son país tre 1921 per infiltrar lei mitans financiers. Après aver participat a una temptativa d'insureccion comunista en 1923, s'exilièt tornarmai en Union Sovietica onte venguèt oficialament agent secrèt.

En 1930, foguèt mandat en China per seguir lei combats entre Chinés e Japonés. Puei, en 1933, foguèt encargat d'infiltrar lo III^en Reich a Berlin en vista d'establir un ret d'espions dins l'ambaissada alemanda en Japon. Vengut membre dau partit nazi, Sorge capitèt de venir un agent diplomatic alemand. Establiguèt tanben de contactes amb de responsables japonés. Aquò li permetèt de descubrir d'informacions sus lo Pacte Anti-Komitern, sus lo Plan Barbarossa e sus l'ataca de Pearl Harbor. Pasmens, victima d'estrès, venguèt pauc a pauc alcoolic. En aost de 1941, descurbiguèt la volontat dei Japonés de se concentrar sus la preparacion de la guèrra còntra leis Estats Units e lo refús de Tòquio d'atacar l'URSS en Extrèm Orient. Aquò permetèt de transferir de tropas sovieticas vèrs l'oèst per participar a la defensa de Moscòu.

Pasmens, leis activitats de Sorge inquietèron lei Japonés que l'arrestèron lo 14 d'octòbre de 1941. Lei Sovietics refusèron de lo cambiar amb de presoniers de guèrra car Sorge aviá avoat son ròtle durant leis interrogatòris. Foguèt pendut lo 7 de novembre de 1944.

Posteritat

Lo ròtle de Richard Sorge durant la Segonda Guèrra Mondiala foguèt reconegut per Nikita Khrushchov en 1964. En particular, lo 5 de novembre, recebèt lo títol d'Eròi de l'Union Sovietica.

Annèxas

Liames intèrnes

• Batalha de Moscòu.
• Segonda Guèrra Mondiala.

Bibliografia

• (fr) Robert Guillain, L'Espion qui sauva Moscou, Seuil, 1981.