Revolucion Neolitica
La Revolucion Neolitica designa la premiera revolucion agricòla que se debanèt principalament durant lo Neolitic. Se caracterizèt per la transicion progressiva de comunautats de caçaires cuelheires nomadas o seminomadas vèrs de comunautats d'agricultors sedentaris. Lei regions dau Creissent Fertil ne'n foguèron lo premier centre, mai la transformacion apareguèt de maniera independenta dins d'autrei regions dau monde. Menèt a l'aparicion dei culturas e dei civilizacions sedentàrias de l'Antiquitat Auta. En mai de l'agricultura, la Revolucion Neolitica regarda tanben l'evolucion dei tecnicas artesanaus e l'organizacion sociala amb l'aparicion d'una division espaciala dau trabalh marcada per l'aparicion de quartiers especializats.
L'idèa de « revolucion neolitica » foguèt popularizada en 1925 per l'arqueològ australian Vere Gordon Childe. Rescontrèt un gròs succès dins lei mitans scientifics e venguèt tanben popular au sen dau public. Pasmens, l'expression es desenant nuançada per leis arqueològs. La « revolucion » foguèt en realitat mai una mutacion dei societats vèrs l'agricultura car i aviá ja de comunautats de caçaires cuelheires sedentàrias que mestrejavan de tecnicas de conservacion permetent de gardar de quantitats importantas de norridura. En mai d'una region, l'aspècte « neolitic » d'aquelei transformacions es egalament discutible car l'existéncia d'un artesanat ben establit es atestat avans l'epòca neolitica. Dins aquò, en despiech d'aquelei resèrvas, l'expression demòra fòrça emplegada dins lei trabalhs istorics per resumir lei mutacions menent a la sedentarizacion, a l'adopcion d'una economia de produccion e a la mesa en plaça d'una organizacion sociala novèla.