Miquèl de Montanha

Miquèu Eiquèm de Montanha (nascut lo 28 de febrièr de 1533 e defuntat lo 13 de setembre de 1592 a Sent Miquèu de Montanha (Perigòrd), foguèt un pensaire e òme politic occitan de la Renaissença.

Montanha per Dumonstier

Biografia

Miquèu de Montanha nasquèt en una familha de negociants de Bordèu, carrièra Rossèla. Son rèiregrand, Ramon Eiquèm, crompèt en 1477 un castèl del sègle XIV, a Montanha (Perigòrd) e accediguèt a la condicion nòbla de « Senhor de Montanha », un títol que transmetèt als sieus descendents. Son grand, Grimon Eiquèm, demorèt mercadièr e contunhèt de far prosperar l'ostal de negòci a Bordèu.

Son paire, Pèir Eiquèm, primièr de la familha a nàisser al castèl de Montanha, en 1495, daissèt lo comèrci e faguèt carrièra dins la armas. Participèt a las campannhas d'Itàlia. En 1519, « nòble òme, Pèire Eiquèm, senhor de Montanha, escudièr », faguèt omenatge a l’arquevesque de Bordèu, sobeiran de la baroniá de Montravel. Sa rotura definitivament atudada, en 1529, maridèt Antoinette Lopez de Villanueva, filha de mercadièrs tolosencs e d'origina judeo-espanhòla convertida al protestantisme. Miquèl, l'ainat de sèt fraires e sòrres recebèt de son paire una educacion liberala e umanista. Tre sa naissença, l'educacion del jove Miquèu seguiguèt un plan pedagogic dirigit per son paire e afinat pels conselhs de sos amics umanistas. Pauc après sa naissença, Montanha foguèt daissat dins un maset, ont visquèt las purmèras tres annadas de sa vita dab la sola companhia d'una familha paisana, « dins l’amira, segon son paire, de lo far venir pus près del pòble, e de sas condicions de vida, qu'a plan de besonh de nòstra ajuda. »

Viatge de Miquèl de Montanha en Alemanha, Soïssa e Itàlia

Après aqueles purmèrs ans espartencs, Montanha tornèt al castèl. L'objectiu èra de far del latin sa primièra lenga. L'educacion intellectuala de Montanha foguèt fisada a un tutor alemand nomenat Horstanus. Son paire embauchava sonque de servents que parlavan latin e ordonèt de s'adreiçar al dròlle sempre en latin. La meteissa règla s'aplicava per sa maire, son paire, los servents, qu'èran totes obligats d'emplegar sonque los mots latins qu'el utilizava, e aqueriguèt aital lo saber de la lenga que son tutor li comunicava. L'educacion latina de Montanha èra acompanhada de contunh d'una estimulacion intellectuala e espirituala. Foguèt familiarizat amb lo grèc per un metòde pedagogic qu'emplegava jòcs, convèrsa, exercicis de meditacion solitària, tant coma los libres.

Ligams extèrnes

• wikimedia Miquèl de Montanha