Liberty ship
Lo tèrme Liberty ship designa un ensemble de 2 710 cargos estatsunidencs construchs durant la Segonda Guèrra Mondiala per assegurar de missions de transpòrt au profiech deis Aliats. D'una longor d'aperaquí 135 m, podián transportar 10 000 t. Sa particularitat principala èra son estandardizacion destinada a permetre l'aplicacion dei principis dau fordisme dins lei chantiers navaus. De mai, lei materiaus utilizats èran de qualitat febla, çò que permetiá de trobar aisament lei matèrias premieras necessàrias. Ansin, en mejana, 70 jorns èran necessaris per acabar la construccion d'un tau naviri[1]. S'aquela produccion accelerada aviá quauquei consequéncias negativas amb de naviris perduts per de defauts de fabricacion, aquò permetèt ais Estats Units de transportar sa produccion militara (avions, carris, municions... etc.) e sei tropas vèrs lei diferents teatres d'operacions. La màger part dei Liberty ship subrevisquèt a la guèrra. Certanei foguèron donats a de país aliats per leis Estats Units que lei gardèron en servici fins ais ans 1970[2].
