Laika
Laika es un dels noms que se donèt a la gosseta que foguèt enviada dins la capsula espaciala sovietica Spotnik 2 lo 3 de novembre de 1957 e venguèt lo primièr èsser vivent terrèstre a dintrar en orbita.
Son nom vertadièr èra Kudrjavka a mai se sovent èra sonada Muttnik (de mutt que en anglés significa bastard e del nom de la capsula Spotnik).
La capsula Spotnik 2 èra estada concebuda per mantenir en vida l'animal e portava de que manjar e d'aiga mas prevesiá pas lo retorn e doncas lo destin de Laika èra ja limitat tre la debuta de la mission. La capsula èra a mai provesida de sensors per tal de permetre lo monitoratge dels signes vitals de la passatgièra coma la pression sanguina, los batements de còr e la frequéncia de respiracion.
Es cèrt que, aprèp lo lançament del Spotnik 2 del cosmodròm de Baikonor, Laika arribèt viva en orbita mas aprèp la dintrada en orbita los detalhs de sa sòrt son desconeguts. Existisson en realitat de versions divèrsas dels faches.
D'unes afirman que Laika moriguèt qualques oras aprèp la dintrada en orbita mentre que d'autres pensan que Laika subrevisquèt pendent gaireben dètz jorns (ipotèsi inversemblanta vist que las batariás qu'alimentavan los sistèmas del Spotnik 2 s'atudèron aprèp gaireben sièis jorns).
La version oficiala de l'epòca que donèt lo govèrn sovietic èra que Laika aviá subreviscut "mai de quatre jorns". Pasmens, en octobre de 2002 venguèron publics los resultats de recèrcas novèlas menadas per un scientific rus (Dmitrii Malashenkov), que revelavan que Laika subrevisquèt unicament pendent un periòde comprés entre cinc e sèt oras aprèp l'enlairada.
Lo Spotnik 2 contunhèt son viatge e faguèt mai de 2000 orbitas abans de se desintegrar en cremar lo 14 d'abril de 1958 quand dintrèt dins l'atmosfèra terrèstra.