Un lac de lava es una massa de lava liquida qu'ocupa un cratèr volcanica. Generalament basaltica, es mantenguda fluida per sa temperatura auta e per la remontada regulara de gas volcanics cauds.

Fotografia dau lac de lava de Kilauea en 1954.

Segon lei conoissenças actualas, existís tres procès de formacion d'un lac de lava. Lo premier es l'arribada d'una gròssa quantitat de lava dins un cratèr. Lo segond es una consequéncia d'un desbordament de lava que ven emplir una depression. Enfin, durant una erupcion, la solidificacion dei materiaus ejectats per un volcan pòu entraïnar una aumentacion de l'altitud dei bòrds d'un cratèr susceptibla de blocar la lava dedins. Lei lacs de lava son generalament de fenomèns provisòris que son existéncia despend de l'activitat dau volcan. Sa temperatura se situa generalament entre 1 000 e 1 250 °C. Una baissa d'aquela temperatura pòu menar a sa solidificacion.

Lei lacs de lava son de fenomèns rars. En 2018, solament tres volcans èran coneguts per aver un lac estable dempuei de decennis : lo Mont Erebus en Antartida, l'Erta Ale en Etiopia e lo Nyiragongo en Republica Democratica de Còngo. Aqueu darrier representa una menaça per lei populacions localas car sei lavas, fòrça fluidas, pòdon agantar la vila de Goma. En mai d'aquò, entre 10 e 15 volcans an au mens un cratèr regularament emplit per un lac de lava efemèr.

En defòra de la Tèrra, dins lo rèsta dau Sistèma Solar, de lacs de lava son estats observats a la superficia d'Io, un satellit de Jupitèr[1].

Liames intèrnes modificar

Bibliografia modificar

Nòtas e referéncias modificar

  1. (en) D. L. Matson et al., « Io: Loki Patera as a magma sea », J. Geophys. Res., vol. 111, 2006.