Georgius Agricola (24 de març de 1494, Glauchau - 21 de novembre de 1555, Chemnitz), de son nom vertadier Georg Pawer ò Georg Bauer, es un sabent alemand de la premiera mitat dau sègle XVI. Figura majora dau periòde, es considerat coma lo paire de la minerologia e de la metallurgia gràcias a son obratge principau, De Re Metallica, que constituís un sintèsi de referéncia sus lei tecnicas minieras e metallurgicas de son epòca.

Retrach de Georgius Agricola.

Biografia modificar

Originari d'una familha aisada – son paire èra tenchurier e marchand de lanatge – Georg Bauer intrèt a l'Universitat de Leipzig a 20 ans. I obtenguèt un diplòma de medecina avans de venir professor de grèc dins l'establiment. Puei, anèt en Itàlia per completar son educacion e i descurbiguèt plusors tractats de medecina classica presentant lei proprietats curativas supausadas dei mineraus. Aquò suscitèt son interès en causa dei jaciments nombrós presents dins sa region d'origina.

Après aqueu viatge, latinizèt son nom – practica frequenta entre lei sabents de la Renaissença[1] – e publiquèt desenant son trabalh sota lo nom de Georgius Agricola. S'installèt alora a Chemnitz e abandonèt la medecina per se concentrar sus l'estudi dei mineraus. En particular, s'interessèt au foncionament dei minas d'argent de Misnia. Foguèt tanben alquimista car redigiguèt un tractat sus la pèira filosofala en 1531. Son òbra principala, De Re Metallica, es una enciclopèdia de dotze volums que sintetizèt totei lei conoissenças de son epòca sus la metallurgia. I presentèt tanben divèrseis arguments per sostenir lo desvolopament de l'industria miniera. En mai de la metallurgia, Agricola s'interessèt egalament a d'autreis aspèctes de la geologia coma la classicacion dei mineraus (De Natura Fossilium, 1546). Foguèt tanben premier cònsol de Chemnitz.

Òbra scientifica modificar

 
Premiera edicion de De Re Metallica.
Article detalhat: De Re Metallica.

Amb Vannoccio Biringuccio (1480-1539), Georgius Agricola foguèt una figura centrala de la fondacion de la metallurgia modèrna en Euròpa durant la premiera mitat dau sègle XVI. D'efiech, De Re Metallica èra la premiera enciclopèdia sus la metallurgia redigida dempuei lei trabalhs d'Albertus Magnus tres sègles aperavans. Son òbra, completada per d'illustracions e per divèrsei tractats anteriors, demorèt una referéncia fins a la Revolucion Industriala e a l'aparicion de la geologia modèrna. Pausèt tanben lei basas de la minerologia e de traduccions de De Re Metallica foguèron edidatas fins au sègle XX.

En son onor, un massís montanhós de la Luna foguèt nomat Montes Agricola.

Annèxas modificar

Liames intèrnes modificar

Bibliografia modificar

  • (fr) Robert Halleux, « La nature et la formation des métaux selon Agricola et ses contemporains », Revue d'histoire des sciences, 1974, vol. 27, pp. 211-222.
  • (fr) Robert Halleux, « Le Bermannus de Georg Agricola et la réinterpretation du vocabulaire minéralogique », Documents pour l'histoire du vocabulaire scientifique, 1983, vol. 4, pp. 81-95.

Nòtas e referéncias modificar

  1. Segon la tradicion dau periòde, aqueu nom foguèt probablament donat per un dei mèstres d'Agricola. Agricola èra la traduccion latina de Bauer que significa païsan.