Feodor von Bock (3 de decembre de 1880, Küstrin - 4 de mai de 1945, Oldenborg) es un manescau alemand de la Segonda Guèrra Mondiala.

Fotografia de Fedor von Bock en 1939.

Intrat coma luòctenent dins l'armada alemanda en 1898, participèt a la Premiera Guèrra Mondiala onte recebèt la medalha Pour le Mérite. Puei, foguèt conservat dins la Reichswehr, l'armada alemanda limitada autorizada per lo Tractat de Versalhas. Venguèt generau en 1929 e, en despiech de son ostilitat au nazisme, se ralièt a Adolf Hitler car sosteniá lei projèctes militars dau Führer. De 1938 a 1942, aguèt donc un ròtle major dins lei guèrras dau IIIen Reich coma cap dei fòrças encargadas d'envaïr Àustria (1938), cap dau Grop d'armadas Nòrd en Polonha (1939), cap dau Grop d'armadas B en França (1940), cap dau Grop d'armadas Centre durant lo Plan Barbarossa (1941) avans de venir cap dau Grop d'armadas Sud (1942). Per son eficacitat e la qualitat de son comandament, foguèt nomat Generalfeldmarschall lo 19 de julhet de 1940.

Tre lo començament de la Guèrra Germanosovietica, von Bock s'opausèt a divèrsei decisions d'Hitler coma l'autorizacion donada a cada soudat alemand de tirar sus tot civiu sovietic considerat coma un partisan. Aquelei tensions foguèron amaisadas per lo generau Walther von Brauchitsch, cap dei fòrças terrèstras alemandas, qu'emeteguèt un òrdre addicionau per insistir sus l'importància de la disciplina au sen dei tropas. Pasmens, de desacòrdis pus grèus apareguèron en julhet de 1942 a prepaus dei plans d'atacas de Caucàs. Lo Führer decidèt alora de retirar son comandament a von Bock e de lo plaçar dins la resèrva fins a la fin dau conflicte. Dins aquò, après lo suicidi d'Hitler, von Bock prepausèt sei servicis a Karl Dönitz mai foguèt tuat durant una ataca aeriana còntra sa veitura.

Lo generau Henning von Tresckow, lo nebòt de von Bock, foguèt un deis organizators dau complòt dau 20 de julhet.

Liames intèrnes modificar

Bibliografia modificar

Nòtas e referéncias modificar