Eugèni Seguret

Eugèni Seguret (en francés: Eugène Séguret; Perpinhan, 1896 – Fau de Nuces, 1956) foguèt un pintor e poèta occitan. Èra l'espós de l'escrivana Calelhon. Amiga de la familha, la cantaira roergassa Emma Calvé li aviá balhat l'escais de "felibre dels uèlhs blaus".

Biografia

Nascut a Perpinhan mas abalit a Rodés, Eugèni Seguret èra lo filh e felen de postièrs rurals roergasses del costat de son paire mentre que sa maire èra catalana. Coneguèt l'escrivan Enric Molin durant la Primièra Guèrra Mondiala e venguèron d'amics inseparables. Foguèt Molin que li faguèt conéisser Juliana Fraisse, que mai tard se diriá Calelhon e qu'èra en aquel temps regenta a Complibat. En 1921 fondèron totes tres Lo Grelh Roergàs. Se maridèron en 1922 e aguèron quatre enfants. Escriguèt qualques òbras amb lo pseudonim de Colin Muset e recebèt qualques guerdons als Jòcs Florals. Trabalhava dins una banca.