Diclòr

Lo diclòr es un compausat quimic de formula Cl₂. Dins lei condicions normalas de pression e de temperatura, es un gas jaune-verd que sa densitat es de 2,5 còps aquela de l'aire. A una odor sufocanta fòrça desagradiva e es soluble dins l'aiga doça, mai pas dins l'aiga salada. Es tanben toxic car leis atòms de clòr de sa molecula pòdon aisament se recombinar amb l'aiga de l'organisme e formar d'acids corrosius.

Ampola de diclòr.

Descubèrt en 1774 per lo quimista Carl Wilhelm Scheele (1742-1786), es un reactiu important de l'industria quimica modèrna. D'efiech, intra dins la fabricacion de l'acid cloridric, dau policlorur de vinil (PVC) e de divèrsei substàncias aguent una liason quimica carbòni-clòr. Es tanben utilizat coma desinfectant, en particular per remplaçar l'aiga de Javèl dins lo tractament de l'aiga potabla, e coma agent de blanquiment dins la fabricacion dau papier. Quauqueis armadas l'adoptèron coma gas de combat, mai aquel usatge es demorat limitat car es pauc eficaç còntra de tropas corrèctament protegidas.

Liames intèrnes

• Clòr.

Bibliografia

• (fr) INRS, « Chlore. Fiche toxicologique n°51 », 2023.