Còdi Morse internacionau
Lo Còdi Morse internacionau (ò alfabet Morse internacionau) es un còdi permetent de transmetre un tèxte per lo mejan d'una seria d'impulsions cortas e lòngas produchas per de signes, una lutz ò un sòn. Son invencion es atribuïda a Samuel Morse (1791-1872) mai aquela paternitat es de còps contestada au profiech d'Alfred Vail (1807-1859), un de seis assistents[1].
Concebut per la telegrafia en 1838, es un sistèma qu'associa un còdi unic compausat de plusors impulsions intermitentas a cada letra, chifra ò signe de pontuacion. Es ansin considerat coma lo precursor dei comunicacions numericas. Aguèt un ròtle major dins lei telecomunicacions fins au desvolopament de la ràdio e dau telefòn. Pasmens, uei, garda un ròtle important car son utilizacion necessita pas un aparelh tecnologicament avançat. Lo morse es donc totjorn en usatge dins lei fòrças armadas, lei telecomunicacions, certaneis espòrts (alpinisme, sotada...), etc.