Batalha deis Illas Santa Cruz
La batalha deis Illas Santa Cruz es una batalha navala de la Segonda Guèrra Mondiala que se debanèt dau 25 au 27 d'octòbre de 1942 dins la region de Guadalcanal. Opausèt una flòta japonesa (4 pòrta-avions, 36 naviris e 199 avions) a una flòta estatsunidenca (2 pòrta-avions, 21 naviris e 136 avions). Foguèt la consequéncia d'una volontat nipona de tornar prendre l'iniciativa sus aqueu teatre e de blocar lei pòrta-avions americans mandats per blocar l'invasion de l'illa per l'armada imperiala. Leis Aliats refusèron pas lo combat car esperavan infligir de pèrdas pron significativas a son adversari per prendre l'avantatge dins lo sector.
_is_abandoned_in_the_late_afternoon_of_26_October_1942.jpg)
La batalha deis Illas Santa Cruz es donc liada a l'ataca terrèstra còntra la basa aeriana de Lunga Point (23-26 d'octòbre de 1942). Coma per lei batalhas aeronavalas precedentas, lei doas esquadras luchèron per mantenir lo contacte e fòrça succès foguèron obtenguts per azard. Lei dos camps deguèron encaissar de degalhs importants e lo combat es generalament coma una victòria tactica de la marina imperiala japonesa. D'efiech, leis Estatunidencs perdiguèrun un pòrta-avions (USS Hornet) e l’USS Enterprise, lo segond pòrta-avions de la flòta engatjada dins lo combat, foguèt tanben grèvament damatjat. Conjugada amb la pèrda de l’USS Wasp en setembre, aquela desfacha compliquèt fòrça la situacion deis Estatsunidencs a l'entorn de Guadalcanal durant plusors setmanas.
Pasmens, a tèrme pus lòng, lo combat es considerat coma una victòria estrategica aliada car lei Japonés aguèron de dificultats de remplaçar sei pèrdas (dos pòrta-avions e un crosaire damatjats). En particular, perdiguèron mai de 60 pilòts experimentats. Aquò agravèt la pèrda de capacitats de son aeronavala car Japon aviá de capacitats feblas per entraïnar de pilòts novèus. Ansin, lo pòrta-avions Hiyo deguèt s'entornar en Japon car aviá plus de pilòts per seis esquadrilhas.
Liames intèrnes
modificarBibliografia
modificar- (en) Eric Hammel, Carrier Strike : The Battle of the Santa Cruz Islands, October 1942, Pacifica Press, 1999.