Batalha de Narvik
La batalha de Narvik es un ensemble de combats que se debanèron dau 9 d'abriu au 8 de junh de 1940 durant la Segonda Guèrra Mondiala. Darriera batalha importanta de la campanha de Norvègia, opausèt d'esquadras e de còrs expedicionaris aliats e alemands. S'acabèt per una evacuacion de la vila per leis Aliats que preferiguèron l'abandonar en causa de problemas logistics.
Dins lo quadre de la campanha de Norvègia, lo pòrt de Narvik èra un enjòc important car permetiá l'exportacion dau minerau de fèrre suedés necessari a l'esfòrç de guèrra alemand. Au començament de l'ofensiva alemanda còntra Norvègia, èra protegit per una flotilha e una division d'infantariá èra presenta dins la region[1]. Lo 9 d'abriu de 1940, una flòta alemanda de 10 destroièrs destruguèt lei 2 naviris norvegians protegissent lo pòrt e desbarquèt una fòrça d'invasion de quauquei miliers d'òmes. Establiguèt un perimètre de proteccion e se turtèt ai tropas norvegianas au nòrd de Narvik.
Lei 10 e 13 d'abriu, doas atacas navalas britanicas entraïnèt la destruccion de l'ensemble dei destroièrs alemands e de plusors cargos (per dos destroièrs perduts). Aquò permetèt d'isolar leis Alemands desbarcats a Narvik. En parallèl, de combats navaus d'esquadras alemandas e britanicas se debanèron au larg de Norvègia. Geinèron lei Britanics mai leis Alemands deguèron escondre la màger part de sei fòrças dins lei pòrts norvegians. Pasmens, leis Aliats poguèron desbarcar d'unitats francesas, britanicas e polonesas per menar una còntra-ofensiva a partir dau 9 de mai. Per sostenir aquel assaut, lei Britanics prenguèron tanben lo contraròtle d'un aeropòrt. Pasmens, mau capitèron d'empachar lei bombardaments de la Luftwaffe e, d'un biais generau, l'aviacion alemanda aguèt un mestritge complèt dau cèu durant la campanha de Norvègia. En l'abséncia de defensa antiaeriana aliada eficaça, poguèt ansin liurament bombardar lei posicions aliadas.
L'ofensiva terrèstra aliada comencèt lo 27 de mai. L'assaut foguèt complicat per l'abséncia de comandament unificat entre Aliats e Norvegians. Pasmens, la superioritat numerica deis asalhidors e la qualitat combativa deis unitats aliadas permetèt de liberar Narvik après de combats fòrça violents. Leis Alemands se retirèron vèrs l'èst dins lei montanhas ont èran menaçats d'enceuclament. Dins aquò, leis Aliats assaièron pas de lei perseguir. D'efiech, inquietats per la superioritat aeriana alemanda, pensavan pas èsser capables de tenir la region. Entre lo 4 e lo 8 de junh, abandonèron donc Narvik que foguèt tornarmai ocupat per leis Alemands. Lei convòis d'evacuacion foguèron encara atacats per leis Alemands que destruguèron lo pòrta-avions HMS Glorious. Pasmens, la màger part dei naviris aliats poguèron s'entornar en Anglatèrra sensa dificultat.
Liames intèrnes
modificarBibliografia
modificarNòtas e referéncias
modificar- ↑ Aquò èra una consequéncia de la Guèrra d'Ivèrn entre l'URSS e Finlàndia. Norvègia aviá mandat de tropas per susvelhar sa frontiera amb l'Union Sovietica.