Boeing B-17 Flying Fortress
Lo Boeing B-17 Flying Fortress es un bombardier pesuc quadrimotor estatsunidenc utilizat per plusors armadas aliadas durant la Segonda Guèrra Mondiala sus totei lei teatres majors dau conflicte. Venguèt ansin un dei simbòls dei bombardaments estrategics menadas per l'aviacion estatsunidenca e, pus generalament, un simbòl de la poissança aeriana deis Estats Units.
.jpg)
Istòria
modificar
Concebut dins lo corrent deis ans 1930, lo B-17 èra un avion rapid (510 km/h) destinat a volar en altitud amb un plafon de 11 200 m. Aviá la capacitat d'emportar 2,7 tonas de bombas e èra equipat de 11 a 13 mitralhièras destinadas a assegurar sa proteccion raprochada. Èra un avion fòrça robust e fòrça B-17 grèvament damatjats foguèron capables de s'entornar a sa basa. L'equipatge èra compausat de 10 personas. Divèrsei versions foguèron desvolopadas e, per respòndre ai besonhs durant la Segonda Guèrra Mondiala, plusors exemplaris foguèron produchs per Douglas e Lockheed. La produccion durèt de 1936 a 1945 e un totau de 12 731 exemplaris sortiguèron deis usinas.
Durant la Segonda Guèrra Mondiala, lei B-17 foguèron mai que mai utilizats per de missions de bombardament còntra de vilas ò d'usinas. Pasmens, participèron tanben a de missions de transpòrt, de lucha còntra lei sosmarins, d'observacion e de recèrca. En Euròpa, se turtèron a l'aviacion de caça e de la defensa antiaeriana alemanda que causèron de pèrdas importantas. En revènge, en Asia, lei B-17 foguèron frequentament engatjats dins d'operacions d'ataca e de secutament dei cònvois maritims. La DCA i èra la menaça principala car lei caçaires japonés avián sovent una poissança de fuòc e un blindatge insufisents per s'atacar a de formacions de B-17. Au totau, leis Aliats perdiguèron 4 750 B-17 durant lo conflicte, siá un tèrç de la produccion.
Après 1945, leis Estatsunidencs remplacèron rapidament sei B-17 per de B-29. Pasmens, quauquei B-17 participèron a la Guèrra de Corèa (1950-1953), sovent per menar de missions de reconoissença e de recèrca. Divèrsei país europèus e sud-americans crompèron e recupèron d'avions. Una partida foguèt utilizada per d'operacions militaras coma lei tres B-17 en servici dins l'aviacion israeliana fins a 1958. D'autrei foguèron convertits per d'usatges coma lei B-17 de l'Institut Geografic Nacionau francés.
Annèxas
modificarLiames intèrnes
modificarBibliografia
modificar- (fr) Enzo Angelucci e Paolo Matricardi, Les avions, t. 4 : La Seconde Guerre mondiale - U.S.A., Japon, U.R.S.S., etc…, Elsevier Sequoia, coll. « Multiguide aviation », 1978, pp. 56-59.