Amanita

Li amanitas son un genre de bolets basidiomicèts a lamas qu'an un aneu e una vòlva generalament blancs. Li espòras son sistematicament blanqui. En lo 2020, environ 600 espècias èran estadi identificadi. Saupre identificar lu espècias manjadissi (oronge...) es important per lu recoltaire que totplen d'amanitas son verinoï (amanita tua-moscas, amanita pantera...) ò mortali (amanita falloïda, amanita printaniera).

Amanita tua-moscas (Amanita muscaria)

Descripcion

Caracteristicas

Una amanita jova sembla a un uòu dins lo sòl. Es totalament envelopat per una membrana blanca. Après l'espelida, lo bolet trauca la membrana cen que libèra lo pen e lo capeu. Lu rèstas de la membrana pòdon tacar de blanc lo capeu, formar un aneu lòng dau pen e una vòlva a la sieua basa. Totun, de pluèias importanti pòdon entraïnar la disparicion d'aquelu trachs distintius. Li lamas son totjorn liuri e li espòras blanqui.

Filogenèsi

Lo genre Amanita enclau 2 sotagenres e 7 seccions :

• lo sotagenre Amanita que comprèn li seccions dei Amanita stricto sensu (exemple Amanita muscaria), dei Vaginatae (Amanita vaginata) e dei Caesareae (Amanita caesarea).
• lo sotagenre Lepidella que comprèn li seccions dei Lepidella strictu senso (Amanita vittadinii), dei Amidella (Amanita volvata), dei Phalloideae (Amanita phalloides) e dei Valideae (Amanita australis).

Comestibilitat e toxicitat

Lo genre dei amanitas comprèn mai d'una espècia comestibla mai lu micològs non conselhan ai amators de li recoltar. En efècte, totplen d'amanitas son mortali e lu riscs de confusion son importants. Totun, la consomacion de manti espècias es tradicionala dins mantuna region : amanita dei Cesars en Mediterranèa, amanita dei Cesars de Zambia en Africa Centrala, amanita de Jackson en Mexic...

Lista dei espècias presenti en Occitània emb los sieus noms vernaculars

• Amanita argentea.
• Amanita battarrae.
• Amanita boudieri.
• Amanita caesarea : amanita dei Cesars, bolet dei rèis, bolet real/reau, domergal/domengal, mojòla, oronge, ovièra, romanèl/romanèla.
• Amanita ceciliae.
• Amanita citrina : amanita citrina, grapaudin jaune, lera jaunastra.
• Amanita crocea.
• Amanita curtipes.
• Amanita eliae.
• Amanita excelsa.
• Amanita friabilis.
• Amanita franchetii.
• Amanita fulva.
• Amanita gemmata.
• Amanita inopinata.
• Amanita lepiotoides.
• Amanita lividopallescens.
• Amanita muscaria : amanita moscalhada, amanita tua-moscas, grapaudin ros, lera rossa, mojòla fòla.
• Amanita nivalis.
• Amanita oreina.
• Amanita ovoidea : amanita ovoïda, colomèla, lera blanca, oronge blanca.
• Amanita pachyvolvata.
• Amanita pantherina : amanita pantèra, grapaudin gris, lera bruna picotada, lera negra picotada.
• Amanita phalloides : amanita falloïda, lera verda, lera verda picotada, oronge verda.
• Amanita ponderosa.
• Amanita porphyria.
• Amanita proxima.
• Amanita regalis.
• Amanita rubescens.
• Amanita simulans.
• Amanita solitaria.
• Amanita strobiliformis.
• Amanita submembranacea.
• Amanita vaginata : amanita vaginada, cocomèla, griseta, lera canilha picotada.
• Amanita verna : amanita printaniera, lera blanca picotada.
• Amanita virosa.
• Amanita vittadinii.

Ligams intèrnes

• Mycota.