Airbus A380

Airbus A380 es un avion de linha civil fòrça gròs-portaire long-corrièr quadrireactor de doble pont produit per Airbus, filiala d'EADS.

Aterratge d'un Airbus A380-800 d'Air France al Los Angeles International Airport

En 2014 es l'avion de passatgièrs pus grand del mond en servici e lo tresen pus gròs avion de l'istòria de l'aeronautica, après lo Hughes H-4 Hercules e l'Antonov An-225. Lo pont superior de l'A380 s'esten sus tota la longor del fuselatge, çò que dona a la cabina 50 % de superfícia en mai que la de son concurrent dirècte, lo Boeing 747-400. Realizèt son primièr vòl lo 27 d'abril de 2005 a Tolosa, e son primièr vòl comercial lo 25 d'octobre de 2007 entre Singapor e Sydney amb Singapore Airlines. Los elements son produch e assemblats dins diferents païses de l'Union Europèa ; los principals o son en França, en Alemanha, en Espanha e al Reialme Unit. D'autres peças venon d'autres païses coma Belgica e l'assemblatge final es realizat sul site de Tolosa, en Occitània.

L'A380 foguèt inicialament prepausat en doas versions :

• L'A380-800, la version passatgièr, que pòt transportar de 525 passagièrs a 853 passagièrs seguent la configuracion (tres classas estandards o classa economica unica).
• La version A380-800F cargo, que pòt emportar fins a 150 tonas de fret.

L'A380-800 a un rai d'accion de 15 400 quilomètres, çò que li permet de volar de Nòva York fins a Hong Kong sens escala, a la velocitat de 910 km/h (Mach 0,85) fins a 1 012 km/h (Mach 0,94). Aquela autonomia foguèt realizada segon la volontat de John Leahy, responsable de vente. Son principal client es Emirates, la companhiá de Dubai avent comandat 50 aparelhs suplementaris lo 17 de novembre de 2013 per portar a 140 sa flòta d'A380. A la seguida del remplaçament de plusors A340-500, l'A380 de Qantas efectua dempuèi septembre de 2014 lo vòl comercial mai long del monde entre Sydney e Dallas/Fort-Worth, siá 13 804 km.