AC/DC

AC/DC (prononciat [ˌæɪsiːˈdiːsiː] en anglés) es un grop anglofòn australian e escossés de hard ròck (sovent aparentat heavy metal) originari de Sydney (Austràlia).

Brian Johnson (cant) e Angus Young (guitarra) en 2008 sus l'empont

AC/DC es estat format en 1973 pels fraires escoceses Angus e Malcolm Young. Lo nom del grop AC/DC ven de la sigla en anglés per corrent electric alternatiu/corrent continú : trobat per una sòrre d'Angus Young, simboliza l'energia quasi electrica que desgatja la musica dels cinc musicians.

AC/DC es considerat ambe Led Zeppelin e Deep Purple coma un dels grops pionièrs del hard ròck, e ambe Iron Maiden e Black Sabbath, de son derivat, lo heavy metal. Pr'aquò, AC/DC a totjorn dich simplament jogar de rock'n'roll ambe d'influéncias blues assumidas.

Los musicians de AC/DC an fòrça cambiat au començament entre 1973 e 1975 dincas a la sortida del segond album en Austràlia T.N.T., puèi lo grop s'es estabilizat, a part Mark Evans qu'es estat remplaçat per Cliff Williams en 1977.

En 1979, lo grop coneis una capitada mondiala ambe son tube Highway to Hell. Mas lo cantaire e co-paraulièr del grop, Bon Scott, se morís lo 19 de febrièr de 1980 après una nuèch de tròp fòrta consomacion d'alcoòl. Brian Johnson, ancian cantaire del grop Geordie, es causit coma remplaçant de Bon Scott. La meteissa annada, lo grop sortís l'album Back in Black, lor mai granda capitada mondiala. L'album d'après, For Those About to Rock We Salute You sortit a la tota fin de l'annada 1981, es tanben una gròssa capitada : es lo primièr de lors albums a aténher la primièra plaça de las ventas aus Estats Units.

La popularitat de AC/DC comença de baissar en 1983, annada pendent la quala Phil Rudd es virat del grop. Lo bateire del grop es alavetz Simon Wright dincas en 1989, puèi Chris Slade, dincas au retorn de Phil Rudd en 1994.

Lo grop coneis un vam novèl de popularitat a la debuta de las annadas 1990 amb la sortida de The Razors Edge, ambe lo tube mondial Thunderstruck en 1990.

Fin 2008, l'album Black Ice es la mai gròssa capitada del grop dins los hit-paradas dempuèi For Those About to Rock We Salute You, atenhent la primièra plaça dins de nombroses païses.

Malcolm Young defunta en 2017 : es remplaçat per Stevie Young, nebot dels fraires Young.

En 2008, AC/DC compta mai de 200 milions d'albums venduts a travèrs lo monde, (71 milions aus Estats Units sonque) pendent sos 35 ans d'existéncia, fasent d'eles l'un dels melhors vendeires de disques. Las ventas de Back in Black son estimadas a 50 milions d'exemplars dins lo monde, çò que'n fa lo segond album lo mai vendut au monde après Thriller de Michael Jackson.

AC/DC es classat 4en dins lo classament dels « 100 melhors grops de hard ròck » de VH1 e 7en dels « melhors grops de heavy metal de tostemps » segon MTV. En 2004, lo grop es classat 72en dins la lista de las « 100 melhors grops musicals de tostemps » de la revista Rolling Stone e 23na dins la lista equivalenta de VH1.

AC/DC es l'unic grop australian de l'istòria a èsser estat numèro 1 dins son país d'origina pendent cinc decennias, ambe Back in Black (annadas 1980), Live (annadas 1990), Black Ice (annadas 2000), Rock or Bust (annadas 2010) e Power Up (annadas 2020).

En Occitània, a part Highway to hell (1979) e Thunderstruck (1990), las cançons las mai conegudas de AC/DC son Touch too much (1980), You shook me all night long (1980), Hells bells (1981), Back in Black (1981) e Big gun (1993). De notar tanben lo tròç T.N.T., sortit en single en Austràlia en 1976 ambe a l'epòca Bon Scott au cant, qu'es devengut retrospectivament un classic de AC/DC, quitament s'aquesta cançon es d'ara enlà cantada sus l'empont per Brian Johnson.

Discografia

• 1975 : High Voltage
• 1975 : T.N.T.
• 1976 : High Voltage
• 1976 : Dirty Deeds Done Dirt Cheap
• 1977 : Let There Be Rock
• 1978 : Powerage
• 1979 : Highway to Hell
• 1980 : Back in Black
• 1981 : For Those About to Rock We Salute You
• 1983 : Flick of the Switch
• 1985 : Fly on the Wall
• 1988 : Blow Up Your Video
• 1990 : The Razors Edge
• 1995 : Ballbreaker
• 2000 : Stiff Upper Lip
• 2008 : Black Ice
• 2014 : Rock or Bust
• 2020 : Power Up

Cançons mai conegudas

• T.N.T. (1976)
• Highway to hell (1979)
• Touch too much (1980)
• You shook me all night long (1980)
• Hells bells (1981)
• Back in Black (1981)
• Who Made Who (1986)
• Thunderstruck (1990)
• Moneytalks (1991)
• Big gun (1993)
• Hard as a rock (1995)
• Rock 'N Roll Train (2008)