Wikipèdia:AcuèlhLutzSus/4 de febrièr

Al Andalús èra lo nom arab donat a las parts de la Peninsula Iberica e de Septimània governadas pels arabs e musulmans nòrd-africans dins lo periòde entre 711 e 1492. A la seguida de la conquista, Al Andalús èra devesit en regions administrativas correspondent aperaquí a Andalosia, Galícia, Portugal, Castelha e Leon, Aragon, Catalonha e Septimània. Coma entitat politica, Al Andalús constituiguèt successivament una província del Califat Omeia, governat pel califa Walid I (711–750); l’Emirat de Còrdoa (750–929); lo Califat de Còrdoa (929–1031); e las taifas, pichons reialmes eissits de l’esberlament de l’estat de Còrdoa.

Dins los sègles seguents, Al Andalús venguèt una província de las dinastias musulmanas berbèras dels Almoravids e Almoads, se fragmentèt puèi en fòrça estats minors, que lo mai conegut foguèt l’Emirat de Granada. Pendent una granda part de son istòria, mai que mai jol Califat de Còrdoa, Al Andalús èra un breç del saber, e la vila de Còrdoa venguèt un centre cultural e economic màger a l’encòp dins lo Bacin Mediterranèu e lo mond islamic.