Tresena batalha de Changsha
La tresena batalha de Changsha se debanèt dins lo corrent de la Segonda Guèrra Mondiala dau 24 de decembre de 1941 au 15 de genier de 1942. Foguèt la tresena ofensiva de l'armada japonesa per conquistar Changsha, crosiera estrategica de China Centrala, après doas reviradas en 1939 e en 1941. Son objectiu èra d'ocupar lei Chinés per leis empachar de sostenir lei Britanics atacats dins lo Sud-Èst Asiatic après l'ataca de Pearl Harbor (7 de decembre de 1941). 120 000 soudats de l'armada imperiala i participèron sota lo comandament dau generau Yuiki Anami. En fàcia, lei Chinés alinhèron 300 000 òmes dirigits per lo generau Xue Yue. L'ataca japonesa conoguèt plusors succès iniciaus coma lo passatge dau riu Miluo (27 de decembre) e menacèron lo nòrd de Changsha. Pasmens, foguèron obligats de se retirar après una còntra-ofensiva chinesa lo 1èr de genier. La retirada de l'armada japonesa, secutada per la guerilha chinesa, aguèt luòc dins de circonstàncias fòrça malaisadas e entraïnèt de pèrdas importantas dins lei rengs de l'armada imperiala (56 746 tuats) e l'abandon de 600 pèças d'artilhariá. De son caire, l'armada chinesa subiguèt de pèrdas pus feblas (28 116 mòrts).
