Tractat de Lausana
Lo Tractat de Lausana es un tractat internacionau signat lo 24 de julhet de 1923. Fa partida dei tractats de patz que marcan la fin de la Premiera Guèrra Mondiala. Signat a l'eissida de la Guèrra d'Independéncia Turca, a la particularitat de remplaçar lo Tractat de Sèvres conclut en 1920 entre l'Empèri Otoman e leis Aliats. D'efiech, lei nacionalistas turcs menats per Mustafa Kemal avián refusat aqueu premier acòrdi. Après plusors guèrras, ocupèron la màger part d'Armenia e de Curdistan e expulsèron l'armada grèga desbarcada dins la region d'Esmirna.
.png)
Lo Tractat de Lausana sancionèt donc la victòria turca e l'Estat fondat per Mustafa Kemal reconquistèt lei regions perdudas en Anatolia per l'Empèri Otoman. Grècia gardèt lo contraròtle de la màger part deis illas de la Mar Egèa. De cambis de populacion foguèron organizats entre lei dos país. La neutralitat dei Destrechs foguèt tornada afiermar. Pasmens, en cambi, Turquia obtenguèt l'annulacion dei limits impausats a sei fòrças armadas e l'abolicion dau regime dei capitulacions que permetiá ai poissanças occidentalas d'intervenir dins leis afaires intèrnes de l'Empèri Otoman.