Tecktonik
La tecktonik, de còps abreujat en TCK, foguèt una mòda de las annadas 2007-2008 en França (Occitània compresa), associant una coregrafia originala calcada sus una musica electronica house / tècno dicha hardstyle e jumpstyle, ambe un paréisser apropriat, copa de pel "mulet" o ambe una cresta punk, colors fluò e vestits motlants, mitenas metal etc. Aquela mòda es estada lançada de dora de caps 2002 a Métropolis, una discotèca situada còsta París a Rungis ont se podiá dançar a l'epòca la tecktonik.
L'un dels primièrs imnes electro de la tecktonik foguèt Alive del grop alemand Mondotek, tube màger de la fin de l'annada de 2007 en França.
La majoritat dels títols de musica electronica associats a n'aquesta dança sustot populara en França èran en anglés, pasmens, i a agut ça que la qualques tròces emblematics en francés coma per exemple la represa tecktonik en 2007 de À caus' des garçons per la cantaira Yelle, lo tròç electro pop Je vais vite de Lorie (en 2007 tanben), la parodia tecktonik Hé, Biloute ! Monte l'son ! Hein ! de Ch'ti DJ (que fasiá resson al succès colossal en 2008 del filme francés Bienvenue chez les Ch'tis), o encara lo tròç electro Sextonik publicat en single en 2009 per Mylène Farmer, qu'i fasiá directament referéncia.
Demest los autres títols emblematics de la tecktonik, se pòt tanben citar Sucker de Dim Chris, la version adobada per Mondotek de One desire de Jakarta, Blink de John Dahlbäck, o encara Feel the Hardrock per Hardrox.
A partir de 2009, la tecktonik comencèt de passar de mòda.
Vejatz tanben modificar
- House
- Tècno
- Vidèo Youtube en francés : "2007 : La génération Tecktonik" https://www.youtube.com/watch?v=c8Pz9RM6Sho