Stephen Gray (decembre de 1666 - 7 de febrier de 1736) èra un fisician e un astronòm britanic. Aguèt un ròtle de remarca dins l'emergéncia dei nocions de conductors e d'isolants.

Nascut a Canterbury dins una familha de tenchuriers, contunièt lo mèstier de son paire mai s'interessèt tanben ai sciéncias. Gràcias a l'ajuda d'amics aisats, aguèt l'accès a de bibliotècas e a d'aparelhs scientifics e poguèt menar una carriera de scientific autodidacte. De mai, capitèt de fabricar d'espereu un telescòpi que li permetèt de menar d'observacions astronomicas relativament precisas. Sei trabalhs interessèron John Flamsteed (1646-1719), premier astronòm reiau, qu'èra a crear una novèla carta dau cèu. Gray e Flamsteed venguèron amics e lo premier se retrobèt indirèctament implicat dins lei garolhas opausant lo segond a Isaac Newton (1643-1727).

Après la victòria de Newton còntra seis adversaris, Gray conoguèt un periòde de dificultats economicas. Vengut assistent de John Theophilus Desaguliers (1683-1744), un sòci de la Royal Society, obtenguèt finalament una pension gràcias a una demanda de John Flamsteed e de Hans Sloane (1660-1753). Gray s'interessèt alora ai fenomèns electrics. En particular, estudièt la generacion de corrents electrics. Après d'experiéncias sus la conductivitat de divèrsei materiaus menadas gràcias a Granville Wheler e d'amics de Flamsteed, participèt a l'emergéncia de la definicion dau concèpte de conductors e d'isolants. Après la mòrt de Newton, son trabalh foguèt finalament reconegut per la Royal Society e Stephen Gray recebèt dos còps la Medalha Copley en 1731 e en 1732.

Liames intèrnes modificar

Bibliografia modificar

Nòtas e referéncias modificar