StarCraft es un videojòc d'estrategia de temps reau desvolopat per Blizzard Entertainment. La premiera version foguèt publicada en març 1998 après lei sortidas de Warcraft: Orcs and Humans e de Warcraft II: Tides of Darkness. Amb mai de 11 milions de còpias vendudas, es un dei succès pus importants de l'istòria dau videojòc informatic. Aquò permetèt la sortida d'una extension, StarCraft: Brood War, novembre de 1998 e d'una seguida, StarCraft 2: Wings of Liberty, en 2010.

L'intriga dau jòc se debana au sègle XXVI e cònta lei guèrras qu'opausan tres espècias diferentas per la dominacion dau Sector Koprulu, una region de la Via Lactèa. Lei Terrans son lei descendents de fòrçats originaris de la Tèrra. Lei Zergs son una raça insectoïda modificada per de manipulacions geneticas per assimilar d'autrei formas de vida. Enfin, lei Protoss son una raça a l'origina d'una civilizacion avançada, anciana e conservatritz. Cada faccion dispausa d'unitats que presentan de diferéncias importantas, çò que necessita d'adoptar de tacticas especificas. Aquela particularitat èra una innovacion importanta en 1998 e es un dei factors qu'explica lo succès dau jòc.

StarCraft compren tanben un mòde multijogaire qu'es lo supòrt de competicions professionalas, especialament en Corèa dau Sud.

Sistèma de jòc

StarCraft es un videojòc d'estrategia fondat sus lo concèpte « recoltar-bastir-conquistar » popularizat per lei serias Command and Conquer e Warcraft. De missions de tipe comandò son tanben prepausadas. Lo jogaire i dispausa d'un nombre limitat d'unitats e dèu percórrer la carta per realizar d'objectius segon un scenari determinat. Pasmens, l'innovacion majora de StarCraft foguèt de prepausar tres faccions fòrça diferentas.

Economia

StarCraft demanda au jogaire de recoltar dos tipes diferents de ressorsas per construrre de basas e crear de tropas :

lo minerau es la ressorsa pus importanta car es requista per la produccion de totei leis unitats. Es en quantitat limitada sus cada carta e son contraròtle es donc sovent un enjòc estrategic.
lo gas vespin es una ressorsa segondària qu'es demandada per fabricar leis unitats pus poderosas. Sei jaciments permèton de'n produrre una quantitat infinida mai la produccion demenís fòrça après l'extraccion d'una quantitat donada de gas.

Lo nombre d'unitats disponiblas es limitat per la construccion de depaus d'avitalhament. Cada unitat consuma una partida de la capacitat d'avitalhament dau jogaire. Pasmens, aquela capacitat pòu pas excedir la valor 200 e leis armaments pus poderós necessitan mai d'avitalhaments que leis unitats pus feblas.

Unitats

Leis unitats de StarCraft son dotadas d'un ensemble de caracteristicas :

l'ataca designa la valor de degalhs infligits a un adversari. Certaneis unitats an doas atacas diferentas coma lo goliath terran qu'utiliza un canon mitralhaire còntra leis unitats terrèstras e de missils antiaerians còntra leis unitats aerianas.
l'armadura e lo bloquier designan la reduccion de degalhs recebuts après una ataca enemiga. Lei degalhs comptabilizats son la diferéncia entre lei valors d'ataca e d'armadura.
lei ponchs de vida designan lo nombre totau de degalhs qu'una unitat pòu subir avans sa destruccion.
una velocitat de desplaçament e un camp de vision.

Leis unitats regularas son produchas per lei bastiments de la basa. Per fabricar leis unitats pus complèxas, es necessari de construrre de bastiments addicionaus. Certaneis unitats particularas an l'estatut « d'eròis ». Son marcadas per una color diferenta e son provesidas per de mecanismes scenaristics. Leis « eròis » an de caracteristicas superioras ais unitats normalas equivalentas e correspondon a d'unitats d'elèit ò a de personatges importants de l'istòria coma Kerrigan, Raynor ò Zeratul.

Mai d'una unitat dispausa de caracteristicas suplementàrias :

lei Protoss an una valor de bloquier e de ponchs de bloquier. Foncionan coma la valor d'armadura e lei ponchs de vida e, per destrurre una unitat protoss, es normalament necessari de li infligir una quantitat de degalhs egala a sei ponchs de vida e a sei ponchs de bloquier. Lei ponchs de bloquier son consumats avans lei ponchs de vida.
lei ponchs de poder mesuran la capacitat d'activar e de mantenir de poders especiaus coma l'invisibilitat ò l'ataca psionica.

Faccions

Protoss

Lei Protoss son una raça guerriera dotada de poders psionics importants. Sus sa planeta d'origina, Aiur, avián un mòde de vida tribau. Sei capacitats psionicas de tria atraiguèron l'atencion dei Xel'Naga, una raça fòrça avançada que protegissiá mai d'una planeta. S'interesavan tanben fòrça a l'estudi dau vivent en vista de crear una vida « perfècta ». Lei Xel'Naga ajudèron lei Protoss dins son desvolopaments. Après quauquei millenaris, lei Protoss venguèron una raça avançada. Pasmens, lei relacions se degradèron amb sei benfactors e lei diferentei tribüs, desirosas de desvolopar son identitat pròpria, s'alunchèron. Lei tensions entraïnèron una revòuta dei Protoss que tuèron per suspresa de miliers de Xel'Naga.

Après la partença dei Xel'Naga, l'unitat de la nacion protoss resistiguèt pas lòngtemps ai desacòrdis tribaus. Durant de sègles, una guèrra civila opausèt lei diferentei faccions. La situacion se reglèt amb la redescubèrta d'un artefacte xel'naga que permetèt de restablir un ancian liame telepatic entre totei lei Protoss. Aquò permetèt de recampar lei Protoss au sen d'una comunautat telepatica unica e de restablir la patz. Una societat de castas foguèt creada per dirigir la nacion protoss. A sa tèsta, se trobèt un « Conclave » format per lei judicators, un grop reduch de Protoss experimentats. La màger part de la populacion jonhèt lei khalais, encargats dau foncionament de la societat. Enfin, lo rèsta formèt lei templiers, una casta militara destinada a protegir Aiur e seis abitants. Lei Protoss que refusèron aquel òrdre novèu deguèron s'enfugir. Considerats coma eretics, fondèron una societat novèla sus la planeta Shakuras e foguèron dichs templiers negres.

Pauc a pauc, lei Protoss adoptèron una filosofia similara a aquelei dei Xel'Naga e comencèron d'explorar l'Univèrs per observar la vida. Pasmens, manipular l'existéncia dei raças descubèrtas foguèt enebit. Es dins aquel encastre que lei Protoss rescontrèron la raça umana dins lo Sector Koprulu. Foguèron lèu intrigats per l'expansionisme uman e per son mòde de vida pauc respectuós de la natura. Pasmens, demorèron fidèus a sa politica de non intervencion fins a l'intrada de patrolhas zergs dins la region. L'analisi dei teissuts organics d'aquela raça novèla mostrèt la preséncia de materiau genetic xel'naga. Aquò foguèt una gròssa suspresa per lei Protoss qu'assaièron de comprendre l'interès dei Zergs per leis umans.

Lei Protoss dispausan d'unitats poderosas dotadas de capacitats ofensivas importantas, d'un bloquier energetic recargable e d'una armadura importanta. En revènge, lo còst d'aqueleis unitats es important e la creacion d'una gròssa armada protoss es donc sovent impossibla. En plaça, es necessari d'organizar una armada pichona, sovent en inferioritat numerica clara. Un autre limit dei Protoss es la necessitat de construrre de cristaus per alimentar sei bastiments. En consequéncia, tota extension d'una basa protoss dèu premier concebre un ret de cristaus.

Zergs

Lei Zergs son originaris de Zerus, una planeta cauda pauc favorabla a l'aparicion de la vida. Èran una pichona raça insectoïda dotada de facultats d'adaptacion de remarca. Aqueu trach intriguèt lei Xel'Naga qu'avián perseguit seis recèrcas après la revòuta dei Protoss. Aquò li permetèt de comprendre l'origina de la resisténcia dei Zergs ai condicions ostilas de Zerus : èran capables d'infiltrar lo sistèma nerviós d'un autre animau per ne'n prendre lo contraròtle. Un sistèma de seleccion genetica dirigissiá totjorn lei Zergs vèrs leis espècias amb un potenciau d'evolucion important.

Pivelats per aquelei caracteristicas, lei Xel'Naga decidèron d'estudiar e de manipular la genetica dei Zergs. Aquò menèt rapidament a la formacion de l'Overmind, una entitat capable d'exprimir la consciéncia collectiva dei Zergs. Aquò entraïnèt la formacion d'una nèbla de Zergs centralizats a l'entorn de l'Overmind que transmetiá seis òrdres per lo mejan de Zergs especializats. La genetica zerg s'adaptèt a aquela transformacion amb l'establiment d'una mena de « barriera mentala » destinada a assegurar lo respècte estricte de la ierarquía. Una autra consequéncia de la formacion de l'eissame foguèt l'aparicion de Zergs especializats dins de pretzfachs especifics.

Per còp d'azard, una raça capabla de viatges galactics s'espotiguèt sus Zerus. Foguèt lèu assimilada per lei Zergs que poguèron s'interessar ai regions perifericas de sa planeta. I descurbiguèron lei Xel'Naga que pensavan a tòrt qu'una ataca èra impossibla en causa de son ròtle decisiu dins l'evolucion zerg. L'ataca durèt solament quauquei jorns e lei Xel'Naga foguèron a son torn assimilats per lei Zergs. Aquò permetèt a l'Overmind d'aquistar totei lei conoissenças de sei creators. Descurbiguèron tanben leis archius que recensavan totei leis observacions xel'naga sus lei raças de l'Univèrs.

Aquò ofriguèt la possibilitat ai Zergs d'identificar leis espècias d'assimilar per perseguir son desvolopament. Pasmens, li permetèt egalament de descubrir l'existéncia e la poissança dei Protoss. L'objectiu major de l'Overmind foguèt desenant de leis absorbir. Dins aquò, avans de realizar aqueu projècte, èra necessari de redurre la diferéncia de poders entre lei Protoss e lei Zergs. En particular, l'Overmind crenhava lei poders psionics protoss. Per aquela rason, s'interessèt ais umans dau Sector Koprulu car lei rapòrts xel'naga indicavan un important potenciau psionic en aquela espècia.

Lei Zergs forman un eissame qu'es compausat de nèblas. L'Overmind es l'expression de la consciéncia collectiva de l'espècia. Seis òrdres son retransmes per una cadena de Zergs especializats. Dins aqueu sistèma, lei pus importants son lei cerebrats qu'asseguran lo comandament efectiu d'un grop de Zergs. A respècte deis autrei faccions, una autra particularitat dei Zergs es son aspècte organic. Totei seis unitats e sei bastiments son d'organismes vivents que son dotats de capacitats de regeneracion que li permèton de garir automaticament après un combat. En revènge, lei construccions zergs dèvon èsser installadas sus una substància especiala, lo creep.

Au combat, leis unitats zergs son generalament mens poderosas que seis adversaris umans e protoss. En revènge, son pus nombrosas car son còst de fabricacion es pus feble. De mai, son tanben generalament pus rapidas. Pòdon donc saturar lei defensas enemigas per li rompre. Enfin, per sostenir aquela estrategia, lei Zergs an quauqueis unitats especializadas dins l'agarriment.

Terrans

Lei Terrans son d'umans originaris d'una populacion de fòrçats expulsats de la Tèrra après de trèbols entraïnats per la subrepopulacion durant lo sègle XXI. Lo contacte foguèt perdut entre lei vaissèus de transpòrt de presoniers e leis autoritats terrèstras. Lei subrevivents arribèron dins lo Sector Koprulu e prenguèron lo nom de Terrans. Sus la planeta Tarsonis, fondèron la Confederacio, un Estat inspirat deis Estats Confederats d'America, que venguèt lèu la poissança umana dominanta de la region. Pasmens, leis umans arribats sus lei planetas Moria e Umoja gardèron son independéncia e fondèron lo Combinat Kel-Morian e lo Protectorat Umojan.

Dins lo rèsta dau Sector, l'egemonia confederada foguèt mau acceptada per certanei colonias. Per exemple, la planeta Korhal se revoutèt còntra la corrupcion dei senators confederats. Menats per Angus Mengsk, lei rebèls obtenguèron lo retirament dei tropas confederadas. Pasmens, en realitat, aquò èra una leca. Angus Mengsk e la quasi totalitat de sa familha foguèron lèu assassinats. Lo darrier subrevivent, Arcturus Mengsk, prenguèt alora la direccion de l'insureccion e s'alièt amb lo Protectorat Umojan còntra la Confederacion. La repòsta foguèt fòrça violenta : una ataca nucleara generala destruguèt Korhal. Dins aquò, Mengsk subrevisqèt car èra absent de sa planeta durant sa destruccion. Amb quauquei fidèus, fondèt lei Fius de Korhal, una milícia que perseguiguèt lo ocmbat còntra la Confederacion gràcias a de tacticas de guerilha.

L'arribada dei Zergs dins lo Sector Korpulu foguèt una suspresa per lei Terrans. De mai, l'amplor de la menaça foguèt pas compresa per lei diferentei faccions. La pichona colonia de Chau Sara foguèt ansin lèu conquistada per leis envaïsseires. Pasmens, aqueu succès durèt gaire. Tre la presa de Chau Sara, una flòta protoss bombardèt la planeta e i exterminèt tota forma de vida. La campanha terran de StarCraft e lo jòc començan amb l'arribada dei Zergs sus la planeta Mar Sara.

Leis unitats dei Terrans son inspiradas deis armaments terrèstres amb la preséncia de soudats armats de fusius, de carris de combat, de pèças d'artilhariá e de caçaires. Lei bastiments pus importants son equipats de reactors que permèton de lei desplaçar. Leis unitats mecanicas e lei construccions pòdon èsser reparadas. En revènge, es pas possible de garir leis unitats d'infantariá dins lo jòc originau car i a ges d'unitat medicala. De mai, se lei bastiments subisson de degalhs importants, un incendi acaba lor destruccion. Au combat, leis unitats terrans son consideradas coma equilibradas car an d'estatisticas intermediàrias entre aquelei dei Protoss e dei Zergs. Sensa aver la poissança dei Protoss, son generalament pus poderosas e mens rapidas que lei Zergs.

Resumit de l'intriga

Campanha dei Terrans

Dins la premiera partida dau jòc, lo jogaire incarna un cap militar de la colonia terrana de Mar Sara. Encargat d'enquistar sus una ataca extraterrèstra, descubrís lei Zergs e destrutz d'installacions de la Confederacion infectadas per leis envaïsseires. Pasmens, lo govèrn confederat – l'organizacion politica que dirigís lei colonias terranas dau Sector Koprulu – ordona l'arrestacion dau jogaire e de Jim Raynor, un marshal locau aguent ajudat a destrurre lei Zergs. Per permetre l'evacuacion dei colons menaçats, lo jogaire es obligat d'acceptar l'ajuda dei Fius de Khoral.

Amb Raynor, lo jogaire raganta lei Fius de Khoral e mena mai d'una mission per Arcturus Mengsk. Aquò permet ai rebèls d'anihilar la Confederacion gràcias a l'utilizacion d'un emetor d'ondas capable d'atraire lei Zergs dins la capitala. Venceire, Mengsk se proclama emperaire e ven lo cap de la màger part dei colonias terranas. Pasmens, durant lo procès, sacrifica son luòctenent, Sarah Kerrigan, çò qu'entraïna la revòuta de Raynor e dau jogaire. Amb un grop de milicians de Mar Sara, lei dos òmes capitan a s'esfugir après aver romput lei linhas dei Fius de Khoral.

Campanha dei Zergs

Dins la segonda campanha, lo jogaire incarna un cerebrat, una creatura encargada de dirigir un grop de Zergs. Dins un premier ensemble de missions, lo jogaire dèu protegir la crisalida Sarah Kerrigan. D'efiech, capturada per lei Zergs, l'èx-luòctenent dei Fius de Khoral es transformada per lei Zergs que son desirós d'aprofichar sei capacitats psionicas per renfòrçar sei fòrças.

Dins lo rèsta de la campanha, lo jogaire e sei tropas son engatjats còntra lo còrs expedicionari dau templier protoss Tassadar. Amb sei fòrças, Tassadar assaia d'enquistar sus lei Zergs per trobar un mejan de leis anientar. Aquò li permet de descubrir la resisténcia dei cerebrats ais armas convencionalas. En revènge, descubrís qu'un grop de Protoss eretics, lei templiers negres, a la capacitat de tuar definitivament un cerebrat. Pasmens, sa còntra-ofensiva es arrestada e l'execucion d'un cerebrat per lei templiers negres permet a l'Overmind, l'esperit que dirigís lei nèblas zergs de localizar Aiur, la planeta d'origina dei Protoss.

Lei darrierei missions fisadas au jogaire son donc destinadas a permetre l'invasion d'Aiur. En despiech d'una resisténcia de part dei Protoss, lei Zergs prènon lo contraròtle d'un temple sacrat que permet a l'Overmind de s'installar dirèctament sus la planeta e d'aumentar sa poissança.

Campanha dei Protoss

La darriera campanha dau jòc comença sus la planeta Aiur onte lo jogaire es cargat de dirigir de còntra-ofensivas còntra lei Zergs. Après quauquei victòrias, permet de redurre la pression militara exercida per lei Zergs e lo Conclave, lo conseu que comanda lei Protoss, decidís de lo mandar dins lo Sector Koprulu per arrestar Tassadar. Pasmens, a son arribada dins la region, lo jogaire chausís de ragantar lo templier rebèl. Aquò entraïna una guèrra civila entre lo Conclave e la faccion fidèla a Tassadar.

Durant aquelei combats, lei rebèls protoss eliminan dos autrei cerebrats zergs gràcias a l'ajuda dau contingent de templiers negres menats per Zeratul. Aquò permet de conclure una trèva amb lo Conclave. Ajudats per lei Terrans de Raynor, lei Protoss de Tassadar e Zeratul atacan e destruson l'Overmind. Dins aquò, Tassadar es obligat de se sacrificar per assegurar la destruccion de la creatura.

Acuelh

StarCraft recebèt un acuelh positiu tant critic que comerciau. Lei sites Metacritic e GameRankings li dònan respectivament de nòtas de 88% e 93%. Se certanei jornalistas observèron de similituds importantas amb de jòcs precedents de Blizzard, la qualitat de l'intriga e de l'Univèrs creat e la diversitat dei tecnicas de jòc necessàrias per mestrejar lei tres faccions foguèron sotalinhadas. Au nivèu comerciau, mai de 1,5 milions de còpias foguèron vendudas en 1998 dins lo mond. Aqueu succès continuèt durant leis ans seguents amb un totau de 11 milions de còpias vendudas entre 1998 e 2009.

Gràcias a aqueu succès, una extension, StarCraft: Brood War, pareguèt en novembre de 1998. Prepausant tres campanhas e quauqueis unitats suplementàrias, foguèt tanben un succès amb 10 milions de còpias vendudas entre 1998 e 2007. Lo jòc venguèt un classic dei competicions de videojòc. Puei, una seguida, StarCraft 2: Wings of Liberty, foguèt editada en 2010, totjorn per Blizzard.

StarCraft

Somari