Soiuz (lançaire)
Soiuz (en rus: Союз, que significa Union) es un lançaire rus que la concepcion remonta a las annadas 1950 e que foguèt utilizat inicialament per lançar los vaissèls amb equipatge del programa Soiuz. Aquel lançaire, d'un pauc mai de 310 tonas e 46 mètres de naut, pòt plaçar una carga utila de mai de 7 tonas en orbita terrèstra bassa a partir dels cosmodròms russes. Es utilizat al jorn de uèi per metre en orbita de satellits militars russes, los equipatges de l'Estacion Espaciala Internacionala, lançar los vaissèls cargo Progress qu'avitalhan l'Estacion espaciala internacionala e per metre en orbita de satellits scientifics russes o europèus. Gràcia a sa fisabilitat e son feble còst de produccion, es totjorn presat malgrat la rusticitat de las tecnicas emplegadas. A la fin de 2017, mai de 1 880 lançaires Soiuz èran estat lançats[1], amb un taus de capitada pròche de 98 %. De julhet de 2011 (retirament del servici de la naveta espaciala americana) a mai de 2020 (primièr vòl abitat del Crew Dragon), lo vaissèl Soiuz foguèt le sol veïcul capable d'enviar un equipatge cap a l'Estacion Espaciala Internacionala.
