Segonda batalha de Smolensk

La segonda batalha de Smolensk se debanèt dins lo corrent de la Segonda Guèrra Mondiala dau 7 d'aost au 2 d'octòbre de 1943. Foguèt una ofensiva majora de l'Armada Roja dirigida per lei generaus Andrei Yeremenko e Vasily Sokolovsky que dispausavan d'aperaquí 1 250 000 òmes, de 20 640 canons, de 1 430 carris e de 1 100 aeronaus. En fàcia, leis Alemands tenián de defensas importantas tengudas per 850 000 òmes sostenguts per 500 carris, 8 800 canons e 700 aeronaus. Lo generau Günther von Kluge assegurèt la coordenacion d'aquelei fòrças.

La progression sovietica foguèt fòrça malaisada en causa de l'importància dei defensas alemandas e de la combativitat deis unitats de la Wehrmarcht. Pasmens, l'URSS enregistrèt mai d'una victòria dins lo corrent d'aquela ofensiva ambé la liberacion de plusors vilas importantas coma Smolensk ò Roslav e ambé lo desgatjament definitiu de la region de Moscòu que foguèt abandonada per leis Alemands. Enfin, la mobilizacion de fòrças alemandas importantas (55 divisions) per arrestar l'ofensiva favorizèt per la seguida l'ataca lòng de Dnièpre que comencèt lo 24 d'aost.

Lo bilanç uman de la batalha es estimat a 450 000 soudats perduts (tuats, bleçats, dispareguts e capturats) per lei Sovietics còntra 200 000-250 000 per leis Alemands.