Robert Nivelle
Robert Nivelle (15 d'octòbre de 1856, Tula - 22 de març de 1924, París) es un generau francés de la Premiera Guèrra Mondiala. Artilhaire de formacion, intrèt dins l'armada en 1880 e èra coronèu au començament dau conflicte. Se destrièt dins lei combats en Alsàcia, lòng de Sòma e durant la batalha de Marna. Foguèt ansin promougut generau en octòbre de 1914. En 1915, organizèt l'ataca de Quennevières que permetèt de melhorar lei posicions francesas en Oise. Après aqueu succès, foguèt nomat cap de la IIa Armada que protegissiá Verdun en mai de 1916. I remplacèt Pétain qu'èra considerat coma tròp defensiu per Joffre. I multipliquèt leis atacas localas que permetèron de desgatjar la fortalesa e de rebutar leis Alemands. Lo 17 de decembre de la meteissa annada, recebèt lo comandament deis armadas francesas dau frònt de l'Oèst. Planifiquèt alora l'ofensiva dau Camin dei Damas que s'acabèt per una revirada après plusors errors grèvas dins son organizacion. L'amplor de la desfacha entraïnèt de mutinariás dins l'armada francesa. Jutjat responsable dau desastre, Nivelle tombèt en desgràcia. Foguèt nomat cap dei fòrças francesas en Africa dau Nòrd, e escartat dei celebracions de la victòria. Pasmens, en 1919, poguèt intrar au Conseu Superior de la Guèrra.
